ԵՐԵՎԱՆ, 15 մարտի — Sputnik. Սպասելի էր, որ Բաքուն կդժգոհի Արցախի նախագահի` ԱՄՆ կատարած այցից։ ՀՀ կառավարության նիստից հետո այս մասին լրագրողներին հայտնեց ՀՀ փոխարտգործնախարար Շավարշ Քոչարյանը։
«Արցախը դե ֆակտո անկախ պետություն է, վարում է իր արտաքին քաղաքականությունը, որը բնական է՝ սահամանափակ է, քանի դեռ չկա միջազգային ճանաչում։ Սակայն ԼՂՀ արտաքին կապերը դրանից պակաս կարևոր չեն դառնում»,-ավելացրեց Քոչարյանը։
Հիշեցնենք, որ մարտի 14-ին ԼՂՀ նախագահ Բակո Սահակյանն այցելել է ԱՄՆ Կոնգրես, հանդիպում է ունեցել արտաքին հարցերով հանձնաժողովի մի խումբ անդամների հետ, քննարկել Արցախ-Միացյալ Նահանգներ հարաբերություններին, ադրբեջանա-ղարաբաղյան հակամարտության կարգավորմանը և տարածաշրջանային գործընթացներին վերաբերող հարցեր: Այնուհետև Կոնգրեսում կազմակերպվել է ընդունելություն՝ նվիրված Արցախյան շարժման 30-րդ տարեդարձին:
Դրանից հետո Ադրբեջանի ԱԳՆ-ն կանչել է ԱՄՆ դեսպանին և բողոքի նոտա է հղել։
ԱՄՆ-ն, Արցախը չճանաչելով, նյութական աջակցություն է ցուցաբերում երկրին, իսկ այժմ նաև հանրապետության ղեկավարին է ընդունել, այն էլ` երկրի գլխավոր օրենսդիր մարմնում։
Սա կապված է Կոնգրեսի ինքնուրույնության հետ. կոնգրեսականները կարող են կարծիք հայտնել, որը կարող է չհամընկնել նույնիսկ Սպիտակ տան տեսակետի հետ։ Ամեն դեպքում վերջին խոսքը Պետդեպն է ասում։
«Կայացած պետություններում արտաքին քաղաքականությունը բավական հետևողական է։ Իհարկե, ցանկացած գործիչ ազատության իր չափն ունի։ Կարելի է փոխել մարտավարական հարցերը, սակայն ոչ գլոբալ տեսակետը։ Մենք սա պարզ տեսանք նաև Դոնալդ Թրամփի դեպքում», — հիշեցրեց Քոչարյանը։
