ԵՐԵՎԱՆ, 15 մարտի — Sputnik. Հայ-թուրքական սահմանին` Կարսում (Արևմտյան Հայաստան, այժմ Թուրքիայի տարածք — խմբ.) գտնվող Անին 961-1045 թվականներին կառավարել են Բագրատունիները, գրում է Dailysabah թուրքական պարբերականը։
«Հնագույն քաղաքը, որտեղ XI-XII դարերին նաև իսլամական հուշարձաններ են հայտնվել, 2016 թվականին ներառվել է ՅՈՒՆԵՍԿՕ-ի համաշխարհային ժառանգության ցանկում», — գրված է հոդվածում։
Կարսի թանգարանի տնօրեն Նեքմեթին Ալպը պատմել է, որ քաղաքն առավել հայտնի է դարձել պատվավոր ցանկում ընդգրկվելուց հետո։
«Ակտիվ աշխատանքներ են տարվել ճարտարապետական և մշակութային ժառանգությունը պահպանելու, դրանք ապագա սերունդներին փոխանցելու համար… Կտրուկ աճել է այցելուների թիվը։ Եթե 2017 թվականին այցելել է 41,685 մարդ, ապա միայն վերջին երկու ամսում Անի է եկել 24,950 մարդ», — ասել է նա։
Պարբերականը ներկայացրել է նաև քաղաքի գեղեցկությամբ հիացած զբոսաշրջիկների մեկնաբանությունները։
«Բոլորի խորհուրդ եմ տալիս այցելել այս քաղաք։ Լուրերում կարդացի Անիի մասին և շատ հետաքրքրվեցի։ Չգիտեի` ինչ եմ տեսնելու, բայց որոշեցի գալ այստեղ։ Ինձ մեծ անակնկալ էր սպասում։ Այն, ինչ տեսա, բոլոր սպասումներից վեր էր. ավելի գեղեցիկ, ավելի կատարյալ։ Կրկին կայցելեմ ընկերներիս հետ։ Եթե չեք տեսել Անին, չեք տեսել աշխարհը։ Ես տեսա աշխարհը», — ասել է Լոնդոնից Անի մեկնած Լեյլա Հալմեցին։
Անին հայտնի է որպես «հազար ու մի եկեղեցիների քաղաք»։ Միջնադարում այստեղով էին անցնում բազմաթիվ առևտրական ճանապարհներ։ Քաղաքում կային բազմաթիվ պալատներ ու հասարակական կառույցներ։ 961-ից 1045 թվականներին Անիի թագավորության մայրաքաղաքն էր, որի սահմաններն ընդգրկում էին ժամանակակից Հայաստանի զգալի մասն ու Թուրքիայի արևելքը։
Անի քաղաքի հարավային եզրին կանգնած է վեհաշուք Մայր տաճարը՝ Սուրբ Աստվածածին եկեղեցին: Այն համարվում է Անիի եկեղեցիների թագուհին, իսկ որոշ մասնագետներ այն համարել են Կովկասի ճարտարապետության զարդը։ Կառուցվել է 989-1001 թվականներին, Տրդատ ճարտարապետի նախագծով։ Այսօր պահպանվել են բացառիկ շինության ավերակները։
