ԵՐԵՎԱՆ, 15 մարտի — Sputnik. Ադրբեջանի ռազմական ծախսերը վերջին մի քանի տարվա ընթացքում նվազել են դոլարային արտահայտմամբ, ինչը կապված է նավթի գների անկման, մանաթի արժեզրկման և այլ գործոնների հետ։ Այս մասին Sputnik Արմենիայի մամուլի կենտրոնում հայտնեց Razm.info ռազմական պորտալի համակարգող Կարեն Վրթանեսյանը։
Փորձագետը կարծում է, որ Ադրբեջանը մոտակա տարիներին հազիվ թե կարողանա նախկին ծավալներով զենք-զինամթերք գնել, այդ թվում` Ռուսաստանից։ Բացի այդ, ռուս քաղաքական գործիչների հայտարարություններից դատելով, Մոսկվան անձամբ է վերանայել Բաքվի հետ ռազմատեխնիկական համագործակցության որոշակի ասպեկտները։ Հիշեցնենք, որ ավելի վաղ այդ մասին ասել էր ՌԴ ԴԺ Դաշնության խորհրդի միջազգային գործերի կոմիտեի նախագահ Կոնստանտին Կոսաչովը։ Նրա խոսքով` 2016 թվականի ապրիլյան դեպքերից հետո Ռուսաստանը փոխել է իր ռազմական քաղաքականությունը Հարավային Կովկասում։
Վրթանեսյանը նշեց, որ ռուսական սպառազինության մատակարարման վերաբերյալ Մոսկվայի և Բաքվի միջև խոշոր պայմանագրեր էին ստորագրվել 2010-2013 թվականներին, և ռուսական ռազմատեխնիկայի այս կամ այն խմբաքանակի մատակարարումն Ադրբեջան (ինչի մասին պարբերաբար և հետևողականորեն գրում են հարևան երկրների ԶԼՄ-ները) իրականացվում է այդ հին պայմանագրերի շրջանակում։
Հարկ է նշել նաև, որ Բաքուն վերջին տարիներին ռազմատեխնիկական համագործակցության ընդլայնման վերաբերյալ ակտիվ բանակցություններ է վարում Պակիստանի հետ։ Իսլամաբադը Արցախյան հակամարտության վերաբերյալ միանշանակ ադրբեջանամետ դիրքորոշում ունի, ավելին, մինչ օրս պաշտոնապես չի ճանաչում Հայաստանը։ Վրթանեսյանի խոսքով, ադրբեջանա-պակիստանյան համագործակցության հարցում, սակայն, դեռ լուրջ առաջընթաց չի լինի։
«Պարբերաբար քննարկվում է 10 միավոր ուսումնամարտական Super Mushak կործանիչների, առանձին օպերատիվ-մարտավարական հրթիռային համալիրների մատակարարման հարցը։ Սակայն այս ամենը դեռ խոսակցությունների մակարդակում է։ Ադրբեջանն ընդհանրապես վերջին տարիներին զենք էր գնում աշխարհի ամենատարբեր երկրներից, և այդ բազմազանությունը դժվարություններ է առաջացնում կիրառման հարցում», — նկատեց նա։
Հիշեցնենք, որ 2018 թվականին պաշտպանության և անվտանգության վրա Ադրբեջանը 1.6 մլրդ դոլար է ծախսելու։ Դա զգալիորեն գերազանցում է Հայաստանի նմանատիպ ծախսերը (512 մլն դոլար), սակայն երեք տարվա վաղեմություն ունեցող իրավիճակի համեմատ, ավելի քիչ է։ Ավելին` այդ գումարի կեսը կծախսվի ներքին զորքերը, ազգային անվտանգությունը պահելու համար։ Պաշտպանության համար շուրջ 800 մլն դոլար կծախսվի։
