ԵՐԵՎԱՆ, 13 մարտի — Sputnik. Փհենչհանի արծաթե մեդալակիր, աշխարհի երկակի չեմպիոն Եվգենյա Մեդվեդևա-Բաբասյանը Օլիմպիական խաղերի ընթացքում կենտրոնանում է միայն արդյունքի վրա։ Այդ ժամանակահատվածում նրան ուրիշ ոչինչ չի հետաքրքրում։ Այս մասին նա խոսել է ELLE ամսագրի հետ հարցազրույցում։
«Ելույթի ժամանակ այնպիսի էներգետիկա եմ զգում, որ շունչս կտրվում է։ Գեղասահքն ինձ համար կյանք է։ Սառույցի վրա բացահայտում եմ ինքս ինձ, ուզում եմ նոր փորձարկումներ անել, մի բան, որը ոչ ոք դեռ չի արել։ Համոզված եմ` ինձ մոտ ամեն ինչ կստացվի», — ասել է Մեդվեդևան։
Նա համարում է, որ օլիմպիական խաղերին մասնակցելը հսկայական փորձ է, որը հնարավոր չէ ստանալ որևէ այլ մրցման ընթացքում։ Մեդվեդևան կոնկրետ կուռք չունի, կարծում է, որ յուրաքանչյուր մարզիկ, յուրաքանչյուր անձ ինքնատիպ է ու գեղեցիկ։
««Սպորտային խառնվածք» ասելով` նախ հասկանում եմ մեծ աշխատանք, համբերություն, նպատակասլացություն ու հանգստություն։ Մարդը գիտի` ինչ է անում ու գնում է դեպի իր ուզածը` հաղթահարելով ինքն իրեն», — ասել է աղջիկը։
Մեդվեդևան պատմել է, որ գեղասահորդների մրցակցությունն ի հայտ է գալիս միայն մրցումների ընթացքում։ Սառույցը միշտ ցույց է տալիս` ով է արժանի հաղթանակի։
Միշտ լավ տեսք ունենալու համար Մեդվեդևան իր հետ մրցումների է վերցնում տոնային քսուկ, աչքերի սուրմա և թարթիչների ներկ։ Մարզումների ժամանակ մաշկը պաշտպանելու համար նա շպարի հատուկ հիմք է օգտագործում։ Աղջիկը մեծ ուշադրություն է դարձնում մազերի խնամքին։
«Ես ոչ մի սննդակարգի չեմ հետևում։ Պարզապես կարիք չկա։ Ամբողջ օրս մարզումներով է անցնում. ամեն ինչ վայրկենապես այրվում է սառույցի վրա։ Իհարկե, չեմ չարաշահում քաղցրը, ճարպերն ու այն մթերքները, որոնք դժվար է սպորտային առողջ սնունդ ավանել», — նշել է Մեդվեդևան։
Միլանի առաջնությունից հետո Մեդվեդևան փոքր դադար կվերցնի։ Վերականգման համար նրան մեկ ամիս է պետք։ Նոր մրցաշրջանում նախատեսում է մասնակցել Գրան պրիին փուլերին, Ռուսաստանի, Եվրոպայի ու աշխարհի առաջնություններին։
