ԵՐԵՎԱՆ, 13 մարտի — Sputnik. Թուրք-ամերիկյան հարաբերությունները ներկա պահին պառակտման կետում են։ Ժամանակն է, որ ԱՄՆ-ն սկսի պահպանել իր խոստումները։ Այս մասին երեքշաբթի Թուրքիայի արտգործնախարար Մևլութ Չավուշօղլուն հայտնել է Մոսկվայի Միջազգային հարաբերությունների պետական ինստիտուտի (ՄԳԻՄՕ) ուսանողների հետ հանդիպմանը, հաղորդում է ՌԻԱ Նովոստին։
«Թուրքիայի ժողովուրդը բացասաբար է վերաբերվում ԱՄՆ-ին, քանի որ նա իր խոստացածը չի կատարում, մշտապես ստում է։ Մեր երկրների միջև հարաբերությունները կործանման եզրին են», — ասել է Թուրքիայի արտգործնախարարը։
Նրա խոսքով` վերջնական կործանումից խուսափելու համար աշխատանքային խմբեր են ստեղծվել։
Անկարան Վաշինգտոնին պայմաններ է առաջադրել. եթե կրկին չպահպանի պայմանավորվածությունները, Թուրքիան այլևս չի հանդուրժի և վերջնականապես կխզի կապերը։
Հիշեցնենք, որ Թուրքիայի և ԱՄՆ-ի հարաբերությունները սրվել են անցյալ տարվա աշնանը։ Թուրքիայի նախագահ Ռեջեթ Թայիփ Էրդողանը Վաշինգտոնին մեղադրել է, որ ահաբեկչության դեմ պայքարի քողի ներքո փորձում է Մերձավոր Արևելքում իրեն անհրաժեշտ կարգեր հաստատել։ Բացի այդ, նրա խոսքով, ամերիկացիները ֆինանսական աջակցություն են ցուցաբերում «Իսլամական պետությանը» (արգելված է ՌԴ-ում)։
