ԵՐԵՎԱՆ, 11 մարտի — Sputnik. 2011 թվականից պրոֆեսիոնալի կարգավիճակ ունեցող մեր հայրենակիցն այս գիշեր անցկացրեց իր թվով 16-րդ մենամարտը: Մրցակիցը 28-ամյա ամերիկացի բռնցքամարտիկ Ռոնի Ռիոսն էր, որը պրոֆեսիոնալ ռինգում անցկացրած 31 մարտերում տարել էր 29 հաղթանակ:
Կալիֆորնիայի Կոստա Մեսա քաղաքի OC Fair & Event Center մարզադահլիճում կայացած մրցամարտն անցավ մեր բնցքամարտիկի բացահայտ առավելությամբ, որը 6-րդ ռաունդում նոկաուտի ենթարկեց իր մրցակցին: Սա նրա թվով 14-րդ հաղթանակն էր, այդ թվում 8-ը՝ անընդմեջ:
Այդպիսով, Ազատ Հովհաննիսյանը պահպանեց WBC-ի վարկածով Ամերիկայի մայրցամաքային թեթևագույն քաշային կարգի չեմպիոնի գոտին:
«Սկզբում ամեն ինչ այնքան էլ լավ չէր ընթանում, ես անգամ ձեռքս վնասեցի։ Ինձ մոտ վատ էր ստացվում մարտը, և ես մի պահ անելանելի դրության մեջ էի»,- մարտից հետո իր առաջին հարցազրույցում ասել է Հովհաննիսյանը։