ԵՐԵՎԱՆ, 10 մարտի — Sputnik. Գավառի աղբանոցում հայտնաբերված տղամարդուն սպանողը թալանել է նրան, իսկ հետո այրել դին ու թաղել աղբանոցում։ Այս մասին հայտնում է shamshyan.com-ը։
Ըստ կայքի` քննիչները պարզել են, որ Միշա Մխիկյանը Գավառ քաղաքի Իսահակյան փողոցի բնակիչ՝ 55-ամյա Հայրապետ Հերգնյանին սպանելուց հետո իրեն պատկանող ВАЗ 2121 մակնիշի 67 AV 700 համարանիշի ավտոմեքենայով դին տեղափոխել, այրել ու թաղել է, իսկ սպանելուց հետո գաղտնի հափշտակել է սպանվածի մոտ գտնվող 900 հազար դրամը, 300 ԱՄՆ դոլարը, որից 180 հազար դրամը թաքցրել է իր տանը, իսկ 864 հազար դրամը ծախսել է Երևան քաղաքում։
Ավելի վաղ նշվել էր, որ սպանության շարժառիթը եղել է 50 հազար դրամի պարտք ու պահանջը։
Այս տարվա մարտի 4-ին սպանվածի կինը դիմել էր Ոստիկանության Գավառի բաժին և հայտնել, որ ամուսինը վերջին անգամ իր հետ հեռախոսազրույց էր ունեցել ժամը 15։00-ի սահմաններում և հայտնել էր, որ գտնվում է Գավառ քաղաքի շուկայի տարածքում և քիչ հետո կհասնի տուն, սակայն այդպես էլ ամուսինը տուն չէր եկել, իսկ ավելի ուշ նրա ձեռքի հեռախոսահամարը դարձել էր անհասանելի։
Ոստիկանները հսկայածավալ աշխատանքներ էին իրականացրել, այդ թվում՝ որոնողական, գրեթե 20 կմ շառավղով փնտրել էին սպանվածին և, իր վերջո, ճիշտ, օպերատիվ ու քննչական գործողությունների արդյունքում հանցագործությունը բացահայտվել էր. հայտնաբերվել էր Մխիկյանը, որը նախկինում մի քանի անգամ դատապարտված է եղել, իսկ հետո արդեն գտել էին զոհին։
