ԵՐԵՎԱՆ, 10 մարտի — Sputnik. Գրոսմայստեր Լևոն Արոնյանի կինը` Արիանա Կաոիլին, Instagram-ում տեսանյութ է հրապարակել, որտեղ երևում է, թե ՀՀ նախագահ Սերժ Սարգսյանն ինչ քայլ է արել Լևոն Արոնյան-Դին Լիրեն պարտիայի սկզբում։
Տեսանյութում երևում է, որ Սերժ Սարգսյանն ընտրել է անգլիական սկզբնախաղ կոչվող C2C4 քայլը։
Տեսանյութից պարզ է դառնում, որ քայլն անելուց առաջ ՀՀ նախագահն այն համաձայնեցրել է Արոնյանի հետ։
Հիշեցնենք, այսօր շախմատի աշխարհի չեմպիոնի կոչման հավակնորդների մրցաշարի բացման հանդիսավոր արարողությանը մասնակցելու նպատակով Բեռլինում գտնվող նախագահ Սերժ Սարգսյանը` որպես մրցաշարի պատվավոր հյուր, կատարել է մրցաշարի առաջին պարտիայի առաջին խորհրդանշական քայլը։
