ԵՐԵՎԱՆ, 10 մարտի — Sputnik, Արմենուհի Մխոյան. ՌԴ նախագահի ընտրության օրը՝ մարտի 18-ին, 08:00-20:00-ն Հայաստանում մշտական կամ ժամանակավոր բնակություն ունեցող ՌԴ քաղաքացիները կկարողանան քվեարկել երկու հիմնական ընտրատեղամասում։ Մեկը կգործի Երևանում ՌԴ դեսպանատանը, մյուսը` Գյումրիում` ՌԴ հյուպատոսությունում:
Գյումրիում հիմնականում կքվեարկեն Շիրակում ու Լոռիում բնակվողները: Բացի հյուպատոսարանից, ևս 3 ընտրատեղամաս կգործի Գյումրիում տեղակայված 102-րդ ռազմակայանի տարածքում: Այս մասին տեղեկացրեց Գյումրիում ՌԴ գլխավոր հյուպատոս Ալեքսանդր Կոպնինը:
«Հյուպատոսարանի տարածքում գործող տեղամասում կարող են քվեարկել ՌԴ բոլոր քաղաքացիները: Եթե մարդիկ ցանկանում են գալ, նախապես ընդգրկվել նախնական ցուցակներում, կարող են գալ, երբ կամենան, իսկ նրանք, ովքեր չունեն դրա հնարավորությունը, կարող են հյուպատոսարանի տարածք գալ հենց ընտրության օրը՝ առանց լրացուցիչ գրանցման»,- ասաց հյուպատոսը։
Նրա խոսքով` ընտրատարածքային ընտրական հանձնաժողովն (ԸԸՀ) արդեն ձևավորվել է և սկսել է իր աշխատանքները:
Ընտրողներն ավելի մանրամասն տեղեկություններ կարող են ստանալ հյուպատոսության կայքից:
«Մենք ամեն ինչ անում ենք, որ մեր քաղաքացիները ստանան անհրաժեշտ տեղեկությունները: Հայերեն և ռուսերեն հայտարարությունները տարածվում են ԶԼՄ-ների միջոցով, կայքում ևս տեղադրվում է ամբողջ տեղեկույթը: Ընտրություններից 2 օր առաջ ԸԸՀ-ն արդեն հերթապահություն կիրականացնի հյուպատոսարանում»,- նշեց հյուպատոսը՝ կոչ անելով ՌԴ քաղաքացիներին մարտի 18-ին ակտիվ մասնակցել քվեարկությանը։
Ռուսաստանի նախագահի ընտրությունը տեղի կունենա մարտի 18-ին, նախընտրական քարոզարշավը պաշտոնապես մեկնարկել է 2018թ-ի դեկտեմբերի 18-ին։ Նախագահի պաշտոնում պաշտոնապես գրանցված թեկնածուներն ութն են` Սերգեյ Բաբուրինը, Պավել Գրուդինինը, Վլադիմիր Ժիրինովսկին, Վլադիմիր Պուտինը, Քսենյա Սոբչակը, Մաքսիմ Սուրայկինը, Բորիս Տիտովը, Գրիգորի Յավլինսկին։
