ԵՐԵՎԱՆ, 10 մարտի — Sputnik. Ադրբեջանական բանակը մտադիր է լայնածավալ զորավարժություններ անցկացնել տանկերի և զրահատեխնիկայի, հրետանու և ինքնաթիռների կիրառմամբ, ուսումնավարժանքները կանցկացվեն երկրի նախագահի ընտրությունից առաջ և ընդդիմության բողոքի ցույցերի ֆոնին։
Ադրբեջանը հայտարարել է, որ մարտի 12-17-ը կանցկացվեն լայնամասշտաբ զորավարժություններ՝ 25 հազար զինծառայողի մասնակցությամբ, կգործարկվեն 250 տանկ և զրահատեխնիկա, 1000 միավոր հրետանա-հրանոթային միջոցներ, 50 միավոր ավիացիա։
Sputnik Արմենիայի հետ զրույցում ռազմական փորձագետ Հայկ Նահապետյանը նշեց, որ ցանկացած զորավարժություն մի քանի նպատակ է հետապնդում, ամենաակնհայտը` զորքի մարտունակությունը ստուգելն է, թերությունները հայտնաբերելն ու վերացնելը։
«Մյուս կողմից, ցանկացած զորավարժություն ներքին և արտաքին սպառող ունի։ Երկրի ներսում զորավարժությունները պետք է նպաստեն բնակչության շարքերում հայրենասիրական տրամադրությունների բարձրացմանը։ Դրանք ցույց են տալիս բանակի ուժը, հակառակորդին հաղթելու պատրաստականությունը», — ասաց Նահապետյանը։
Սա հատկապես կարևոր է երկրում կայանալիք ընտրությունների ֆոնին։ Նրա խոսքով` Իլհամ Ալիևը ժողովրդին ցույց է տալիս, որ վճռական է տրամադրված Ադրբեջանի կորցրած տարածքներն ուժով վերցնելու հարցում։
Փորձագետը չի բացառում, որ նման քանակի զինվորականների և տեխնիկայի կիրառումը կարող է նաև որոշակի սադրանքի տարր պարունակել։
«Ցանկացած զորավարժություն կարող է ռազմական գործողության վերածվել, առավել ևս, որ զորքերը մարտական պատրաստվածության վիճակում են։ Չեմ բացառում նաև այդ սցենարը», — ասաց Նահապետյանը։
Նրա խոսքով` նման սցենարն ամբողջությամբ համապատասխանում է ամերիկյան հետախուզության զեկույցի գնահատականին, ըստ որի` Արցախում լայնածավալ ռազմական գործողությունների վերսկսման հավանականություն կա։ Մյուս կողմից` նման ենթադրություններ կան սկսած 1994 թվականից, սակայն մինչ օրս պատերազմ չկա։
Միևնույն ժամանակ փորձագետը կարծում է, որ հակամարտության սրացումը, լայնածավալ ռազմական գործողությունների մեկնարկը կհանգեցնի ՀԱՊԿ-ի, մասնավորապես` Ռուսաստանի, ինչպես նաև Թուրքիայի և ՆԱՏՕ-ի անդամների ներգրավմանը։
«Չեմ կարծում եմ, որ Ադրբեջանն այդքան արկածախնդիր է կամ Անկարայի կողմից այնքան ուժեղ ճնշումների է ենթարկվում, որ նման գործողությունների դիմի», — նշեց Նահապետյանը։
Նա կարծում է, որ այսօրվա պայմաններում այդ զորավարժությունները ուժի ցուցադրում է արտաքին աշխարհի համար և վճռականության ցուցադրում` ներքին լսարանի համար։ Ադրբեջանի իշխանությունները, որպես մարտի դաշտում պարտություն կրած երկիր, պետք է ցուցադրեն իրենց ուժը` ընտրություններում ձայներ ստանալու համար։
Արևելագետ Արտյոմ Տոնոյանն իր հերթին Sputnik Արմենիայի հետ զրույցում նշեց, որ Ադրբեջանում ցանկացած զորավարժություն հակահայկական ուղղվածություն է ենթադրում։
«Սակայն այս դեպքում, ամենայն հավանականությամբ, դրանք ներքաղաքական իրավիճակով են պայմանավորված։ Նախագահական ընտրություններ են սպասվում, ու թեև հիմնական ընդդիմադիր ուժերն այդ ընտրություններին չեն մասնակցում, նրանք հայտարարել են համազգային ցույցեր անցկացնելու մասին` սկսած մարտի 10-ից», — ասաց Տոնոյանը։
Նրա խոսքով` Ադրբեջանի իշխանությունը փորձում է վախեցնել ժողովրդին ռազմական գործողությունները վերսկսելու հնարավորությամբ։ Տարբեր փորձագետների միջոցով նրանք ԶԼՄ-ներում կարծիքներ էին տարածում այն մասին, որ առաջիկայում ռազմական գործողությունները կարող են վերսկսվել։
Ժողովրդին լարվածության մեջ պահելով` Ադրբեջանի ղեկավարությունը փորձում է բացառել ցանկացած տիպի ներքաղաքային գործընթացներ, որոնք կարող են սպառնալ իշխանությանը։
«Չի բացառվում, որ լարվածությունն ուժեղացնելու համար ադրբեջանցիները կարող են սադրանքի գնալ սահմանի վրա, հայկական կողմը պետք է ուշադիր լինի, և այդ մասին այստեղ տեղյակ են», — ասաց Տոնոյանը։
Նա նշեց, որ նույնիսկ զորավարժություն անցկացնելու մասին հայտարարության մեջ Ադրբեջանի ՊՆ-ն նշել է, որ մշակվելու է «պաշտպանությունն ու հակագրոհը», ինչով իշխանությունները հասարակությանը հուշում են, թե հայերն իբր կարող են հարձակում գործել։
Փետրվարի 5-ին Ադրբեջանի նախագահ Իլհամ Ալիևը արտահերթ նախագահական ընտրություններ անցկացնելու վերաբերյալ հրաման էր ստորագրել։ Փաստաթղթի համաձայն` նախագահական ընտրությունները կանցկացվեն ոչ թե 2018 թվականի հոկտեմբերին, ինչպես նախատեսվում էր, այլ ապրիլի 11-ին։
