ԵՐԵՎԱՆ, 8 մարտի — Sputnik. «Հրապարակ» թերթը զրուցել է քաղաքագետ Ստեփան Գրիգորյանի հետ: «Եթե անգամ Մեծ Բրիտանիայի պատկան մարմինները տան համապատասխան տեղեկանք, որ Սարգսյանը 2011-ից այլևս այդ երկրի քաղաքացի չէ, միևնույն է՝ դրանից իրավիճակը չի փոխվի, քանի որ նա եկել է ոչինչ անել չկարողանալու համար:
Որքան էլ դու ներկայացնում ես քո ծրագրերն ու նպատակները, որոնք պետք է իրագործես ի պաշտոնե, մեկ է՝ դու դրանք իրագործել չես կարողանալու՝ լծակներ չունենալու պատճառով: Ուրեմն՝ ինչ կարիք կա սին պատրանքներ ստեղծել հանրության մոտ և հերթական անգամ խաբել ու հիասթափեցնել»: Քաղաքագետը կարծում է, որ ՀՀ չորրորդ նախագահը չի պաշտոնավարի մինչև իր լիազորությունների ավարտը, և չի բացառվում, որ կեսից հրաժարական տա: «Արմեն Սարգսյանը տրիվիալ մարդ չէ, և նա յոթ տարի չի ձգի՝ դիմանալով այս խայտառակություններին»,- ասել է Գրիգորյանը:
Մեր զրուցակցին հասցրինք՝ իր համար պարզաբանված է այն գլուխկոտրուկը, թե ինչու իշխանություններն Ա. Սարգսյանին բերեցին հենց այժմ և հատկապես նախագահի պաշտոնում, այլ ոչ թե վարչապետի: «Նոր կառավարման մոդելի պարագայում վարչապետի պաշտոնը, բնականաբար, պահվում է Սերժ Սարգսյանի համար, և այստեղ ոչ մի գաղտնիք չկա: Դուք ինչ եք ուզում՝ որ գործընթացների ամբողջ շղթան, որով ամեն ինչ արվում է վարչապետին գերբնական լիազորություններով օժտելու համար, այդ ամենն իշխանությունն աներ Արմեն Սարգսյանի համար: Ո՛չ, երբեք, նման բան կարող է արվել միմիայն Ս. Սարգսյանի համար»,- ասել է Գրիգորյանը:
Ի դեպ՝ Գրիգորյանի ղեկավարած ՀԿ-ն, ի թիվս 9 այլ ՀԿ-ների, նախօրեին արձագանքել էր Ա. Սարգսյանի՝ ՀՀ նախագահ ընտրվելու փաստին ու կասկածի տակ դրել նրա ընտրության սահմանադրականությունը: Ա. Սարգսյանի կողմից որևէ արձագանք այս հայտարարությանը չի հետևել»,-գրում է թերթը:
