ԵՐԵՎԱՆ, 7 մարտի — Sputnik. Գրող Նարինե Աբգարյանի «Շարունակել ապրել» գրքի շնորհանդեսը տեղի է ունեցել մարտի 5-ին Ռուսաստանի մայրաքաղաքի «Մոսկվա» գրախանութում։ Այս գիրքը նրանց մասին է, ովքեր պատերազմ են տեսել։
«Ես դժվարությամբ եմ գրում պատերազմի մասին, քանի որ դա անձնական պատմություն է։ Այս պատերազմը տեսել ենք մենք։ Ես տեսել եմ, թե ինչպես են բոլորը տանջվում։ Ցավոտ է։ Պատերազմի հետևանքը մենք մինչև հիմա էլ զգում ենք։ Ծանր է ու դժվար»,- Sputnik Արմենիային ասաց Աբգարյանը։
Հայերի ամենակարևոր հատկության մասին խոսելիս` նա առանձնացրեց հումորի զգացումը։
«Մեր բնավորության ամենահիասքանչ գիծը հումորի զգացումն է։ Դա է մեզ փրկում, քանի որ մեր կյանքը քաղցր չէ։ Պատմական այն իրադարձությունները, որոնք ապրում ենք մենք, նույնպես քաղցր չեն, բայց մենք կարողանում ենք ծիծաղել մեզ վրա»,- ասաց Աբգարյանը։
Նա հույս ունի, որ հայերը կկարողանան միշտ ծիծաղել և ապագայում ամեն ինչ լավ կլինի։
Արցախյան պատերազմը վերապրածների մասին․ ի՞նչ խոստում է տվել Նարինե Աբգարյանը
Աբգարյանն ավելի ասել էր, որ գրքում մեկ պատմվածքը հյուսված է մյուսին շղթայի օղակների նման, նախորդ պատվմածքի երկրորդական հերոսը երկրորդի գլխավոր գործող անձն է դառնում, մեկի վշտից մյուսի վիշտն է խնվում ու այդպես անվերջ։ Գրքում պատերազմի վայրագությունները, սպանություններն ու այլ սարսափները ներկայացված են արցունքների, չապաքինվող վերքերի, կորուստների և հուշերի միջոցոով։
2016 թվականի նոյեմբերին Նարինե Աբգարյանը դարձավ «Յասնայա պոլյանա 2016» հերթական գրական մրցանակի դափնեկիր իր «Երկրնքից ընկավ երեք խնձոր» գրքի համար։ Նա լավագույնը ճանաչվեց «XXI դար», նաև «Ընթերցողների ընտրություն» անվանակարգերում։
