ԵՐԵՎԱՆ, 6 մարտի — Sputnik. Հայաստանի առողջապահության նախարարությունը շարունակում է հետևել, որ կոնկրետ դեղերն առանց դեղատոմսի չվաճառվեն։ Այս մասին այսօր կառավարության նիստում հայտնեց առողջապահության փոխնախարար Սամվել Մարգարյանը։
Մարտի 1-ից հակաբիոտիկներն ու հորմոնալ, ինչպես նաև կոդեին պարունակող դեղամիջոցները վաճառվում են բժիշկի դեղատոմսով, իսկ հոկտեմբերի մեկից այդ օրենքը կգործի բոլոր այն դեղերի համար, որոնք պետք է միայն դեղատոմսով վաճառվեն։
«Ուշադիր հետևեք, որ այդ դեղամիջոցներն առանց դեղատոմսերի չվաճառվեն», —ասաց վարչապետ Կարեն Կարապետյանը։
Հայաստանում մոտ 4 700 դեղ է գրանցված, դեղատոմսով վաճառքի են ենթակա դրանցից 2700-ը։
Դեղատոմսերի հետ կապված հսկողության ուժեղացումից գոհ չէ հասարակությունը, հատկապես` տարեցները, որոնք հաճախ են դեղերի կարիք ունենում, վախենում են, որ այդ խստացման հետևանքով հերթեր կգոյանան պոլիկլինիկաներում։
Իսկ վերջին շաբաթվա ընթացքում մի շարք բժիշկներ ու իրավաբաններ հայտնել են, որ որոշումը լրացուցիչ իրավական ակտեր է պահանջում։ Սակայն վարչապետի այսօրվա ելույթը ցույց տվեց, որ որոշումն ուժի մեջ է մտել, և իշխանությունը չի պատրաստվում չեղարկել այն։
