ԵՐԵՎԱՆ, 5 մարտի — Sputnik. Ֆրանսիան դեմ է ցանկացած հայտարարության, որը կարող է բացասական ազդեցություն ունենալ Հայաստանի և Ադրբեջանի միջև բանակցային գործընթացի վրա։ Այս մասին երկուշաբթի լրագրողներին հայտնեց Հայաստանում Ֆրանսիայի դեսպան Ջոնաթան Լաքոտը` մեկնաբանելով նախագահ Իլհամ Ալիևի աղմկահարույց հայտարարությունը։
«Ֆրանսիան դեմ է հանդես եկել այդ հայտարարություններին», — ասաց դիվանագետը` մեկնաբանելով Ֆրանսիայի ԱԳՆ-ի արձագանքը։ Դեսպանի գնահատմամբ` Փարիզը դատապարտում է ցանկացած հայտարարություն, որը կարող է բացասաբար անդրադառնալ բանակցային գործընթացի վրա։
Միևնույն ժամանակ դեսպանը կոչ է արել երկիմաստություն չփնտրել Փարիզի արձագանքում։
Հիշեցնենք` փետրվարի 8-ին «Ենի Ադրբեջան» կուսակցության VI համագումարում Իլհամ Ալիևը հայտարարել էր, որ «Էրիվանը Ադրբեջանի պատմական հողն է, և ադրբեջանցիները պետք է վերադարձնեն այն»։ Նրա ելույթը Երևանի կողմից արդար արձագանքի արժանացավ: Հայաստանի նախագահ Սերժ Սարգսյանն ասաց, որ այդ հայտարարությունները զառանցանք են, սակայն Եվրոպայի լռության պայմաններում նման անհեթեթությունները կարող են շատ լուրջ հետևանքներ ունենալ:
Ֆրանսիայի ԱԳՆ-ն արձագանքել է այդ հայտարարությանը երկու շաբաթ անց. Ֆրանսիայի արտաքին գերատեսչության պաշտոնական հայտարարության մեջ ասվում էր, որ Փարիզը «հակված է ԼՂՀ հակամարտության խաղաղ կարգավորմանը» և կողմերին կոչ է անում «զերծ մնալ ցանկացած հայտարարություններից կամ գործողություններից, որոնք կարող են սրել իրավիճակը»։
