ԵՐԵՎԱՆ, 5 մարտի — Sputnik. Ֆրանկոֆոնիայի գագաթնաժողովը կարող է այն միջոցառումը դառնալ, որն ավելի շատ զբոսաշրջիկներ կբերի Հայաստան, հայտնեց Հայաստանում Ֆրանսիայի արտակարգ և լիազոր դեսպան Ջոնաթան Լաքոտը։
Հայաստանը պետք է պատրաստ լինի համապատասխան զբոսաշրջային առաջարկ ներկայացնել, կարծում է դեսպանը։
«Օրինակ` տուրիստական օբյեկտներում պետք է նկարագրություններ և ցուցատախտակներ լինեն ֆրանսերենով։ Նման մոտեցումը կօգնի ոչ միայն Ֆրանսիայից զբոսաշրջիկներ ներգրավել, այլև ֆրանսիախոս», — ասաց Լաքոտը` պատասխանելով Spitnik Արմենիայի հարցին։
Ֆրանկոֆոնիայի մշակույթի օրերը, որոնք Հայաստանում կանցկացվեն մարտի 12-ից ապրիլի 12-ը, հագեցած են լինելու, ասաց դեսպանը։ Նրա խոսքով` ամբողջ 2018 թվականը կանցնի Ֆրանկոֆոնիայի հովանու ներքո, ներառյալ` «Ոսկե ծիրանն» ու «ՌեԱնիմանիան»։
Հայաստանում Ֆրանսիայի արտակարգ և լիազոր դեսպանը ներկայացրեց միջոցառումների ծրագիրը։ Մարտի 20-ը Հայաստանում և ամբողջ աշխարհում (որտեղ անգլիալեզու միջոցառումներ են անցկացվում) Ֆրանկոֆոնիայի օր է ճանաչվել։
Ամբողջ աշխարհում 274 միլիոն մարդ է ֆրանսերեն խոսում։ Այդ լեզուն ամենաարագ տարածվող լեզուն է համարվում աշխարհում, և որոշակի հաշվարկների համաձայն` 2050-2060 թվականին ֆրանսիախոս մարդկանց թիվը 7 մլն-ի կհասնի։
Ինչ վերաբերում է Հայաստանին, ֆրանկոֆոնիայի անցկացումն այստեղ ավանդական է դարձել։ Ամենակարևորն այդ հարցում հայկական իշխանությունների և Հայաստանում Ֆրանսիայի դեսպանատան սերտ համագործակցությունն է։
Նախագծի առաջնահերթ խնդիրն է միավորել Հայաստանի ֆրանսիախոս քաղաքացիներին, որոնք էլ իրենց հերթին կարող են իրենց շուրջ հավաքել ծանոթներին ու բարեկամներին։
««Մոսկվա» կինոթատրոնում մարտի 12-18-ը կանցկացվի Ֆրանկոֆոնիայի ֆիլմերի երկրորդ փառատոնը Կանադայի, Շվեյցարիայի դեսպանատների աջակցությամբ։ Փառատոնի շրջանակում հանդիսատեսը հնարավորություն կունենա դիտելու 9 ֆիլմ ֆրանսերենով (հայերեն և ռուսական լուսագրերով)։ Կցուցադրվեն անցյալ տարիների ֆիլմերը` կատակերգություն, դրամա, անիմացիոն ֆիլմեր», — նշեց ֆրանսիացի դիվանագետը։
Մարտի 19-ից 22-ը ուշադրության կենտրոնում են լինելու խոհարարությունն ու պատկերապատումները, այդ միջոցառումների շրջանակում ֆրանսիահայ շեֆ-խոհարար Սոնյա Եզգուլյանը, ինչպես նաև դիզայներ Գիյոմ Լոնգը Հայաստան կժամանեն և վարպետության դասեր կանցկացնեն։
Երրորդ միջոցառումը կմեկնարկի մարտի 20-ին։ Տեսահոլովակների և բանավոր խոսքի մրցույթը կկոչվի «Եվ բացի այդ ես խոսում եմ ֆրանսերեն… Հայաստանում»։ Միջոցառումը ֆրանսերենը կատարելագործելու հիանալի հնարավորություն կտա։
Դեսպանն ավելացրեց, որ մրցույթի վեց հաղթողներն այս տարվա ֆրանսերենի դեսպաններ կդառնան, իսկ հաղթողը շրջագայության կմեկնի Ֆրանսիա։
Մարտի 24-ին ֆրանսերենի քննություն կանցկացվի, որին կարող են մասնակցել 13-25 տարեկանները։
Գյումրիում մարտի 30-31-ին կանցկացվի «10-ից 10» թատերական փառատոնը։ Իսկ ապրիլի 11-12-ին Սպենդիարյանի անվան օպերայի և բալետի ազգային ակադեմիական թատրոնում մաեստրո Կոնստանտին Օրբելյանի ղեկավարությամբ կհնչի ֆրանսիացի կոմպոզիտոր Ժյուլ Մասնեի «Մանոն» օպերան։
