ԵՐԵՎԱՆ, 5 մարտի — Sputnik. ԵԱՏՄ-ի և Իրանի միջև ազատ առևտրի գոտին կարող է ձևավորվել մինչև 2018 թվականի մայիսը։ Ինչպես տեղեկացնում է ՌԻԱ Նովոստին, այդ մասին տեղեկացրել է Ռուսաստանի առաջին փոխվարչապետ Իգոր Շուվալովը Իրանի էկոնոմիկայի և ֆինանսների նախարար Մասուդ Կարբասիանի հետ հանդիպման ժամանակ։
Շուվալովի պարզաբանմամբ` մայիսին տեղի կունենա ՌԴ նոր նախագահի երդման արարողությունը, և կհայտարարվի նոր կառավարության կազմի մասին։ Կողմերը մտադիր են համաձայնագիրը ստորագրել մինչ այդ արարողությունը։
Ավելի վաղ Հայաստանի տնտեսական զարգացման և ներդրումների փոխնախարար Հովհաննես Ազիզյանը, ով նաև ԵԱՏՄ բանակցային խմբի կորդինատորն է, հայտարարել էր, որ համաձայնագիրը հավանաբար կստորագրվի 2018 թվականին։
«Դա մեր տնտեսական հայեցակարգում մեծ առաջընթաց կլինի և մայիսին ավարտվող քաղաքական շրջափուլի հիանալի արդյունք»,- հայտարարել է Շուվալովը։
Կարբասիան հայտնել է, որ Ռուսաստանի և Իրանի միջև բոլոր ոլորտներում բարիդրացիական հարաբերություններ են ստեղծվել։
«Որոշ արևմտյան պետություններ չհիմնավորված ճնշում են գործադրում մեզ վրա։ Կարծում եմ, որ մեր երկրների միջև ստեղծված ռազմավարական հարաբերությունները կարող են ամուր պատ դառնալ այդ անարդար միջոցառումների ու քայլերի առաջ»,- հավելել է Իրանի նախարարը։
Ինչպես տեղեկացվել էր նախկինում, համաձայնագիրը կկնքվի երեք տարով, որից հետո այն անժամկետ կերկարաձգվի։
