ԵՐԵՎԱՆ, 5 մարտի — Sputnik. ՀՀ նորընտիր նախագահ Արմեն Սարգսյանն այսօր՝ սպարապետ Վազգեն Սարգսյանի ծննդյան օրը, այցելել է նրա հայրական տուն, հանդիպել ծնողների ու ընտանիքի անդամների հետ։
Հանդիպման լուսանկարները ֆեյսբուքյան իր էջում հրապարակել է Վազգեն Սարգսյանի ավագ եղբայրը՝ Արմեն Սարգսյանը:
Վազգենի Սարգսյանի եղբայրն այս հրապարակմամբ թերևս հերթական անգամ փորձում է հերքել մամուլում լայն տարածքում ստացած լուրերը` Հայաստանի 4-րդ նախագահ Արմեն Սարգսյանի ու 1995-99 թթ պաշտպանության նախարար Վազգեն Սարգսյանի երբեմնի լարված հարաբերությունների մասին։ Ըստ լուրերի` Արմեն Սարգսյանը հենց Վազգեն Սարգսյանի հետ ունեցած վեճի պատճառով է ժամանակին հեռացել Հայաստանից։ Արմեն Սարգսյանն արդեն առիթ ունեցել է հերքելու այդ տեղեկությունը` նշելով, որ նման բան չի եղել, և որ ինքը ՀՀ վարչապետի պաշտոնը ստանձնելուց 4 ամիս անց հեռացել է առողջական ծանր խնդիրների պատճառով և Լոնդոնում բուժում անցնելու նպատակով:
