ԵՐԵՎԱՆ, 3 մարտի — Sputnik. Ամերիկահայ հայտնի գրող և բանաստեղծուհի Դիանա Տեր-Հովհաննիսյանը մահացել է մարտի 2-ին ԱՄՆ-ի Քեմբրիջ քաղաքում։ Այս մասին հայտնում է Armenian Weekly-ն։ Մայիսի 21-ին նա կդառնար 84 տարեկան։
Դիանա Տեր-Հովհաննիսյանի ընտանիքը Խարբերդի նահանգի Տադեմ գյուղից է (Արևմտյան Հայաստան)։ Նրա հայրը՝ Հովհաննես Տեր-Հովհաննիսյանը, եղել է հայտնի հայ ֆիդայիներից մեկի՝ Մուրադ Սեբաստացու քարտուղարը և հետագայում անցել է Հայ Յեղափոխական Դաշնակցության շարքերը։ Առաջին հանրապետության կառավարությունն Հովհաննեսին ուղարկել է ԱՄՆ-ի Միչիգան նահանգ, որտեղ նա պետք է կրթություն ստանար։
Հովհաննես Տեր-Հովհաննիսյանն Ամերիկա է մեկնել Ճապոնիայով, որտեղ նրան օգնել է «արևելքի հայ աստղ» Դիանա Աբգարը՝ նստեցնելով ԱՄՆ ուղևորվող նավը։ ԱՄՆ-ում Հովհաննեսը դարձել է Ջոն և ամուսնացել Մարիան Իսրայելյանի հետ, որը նույնպես Տադեմ գյուղից է եղել։ Համագյուղացիները, որոնք իրար գտել են ամերիկյան հողում, դուստր են ունեցել։ Նրան անվանել են ի պատիվ Դիանա Աբգարի։
Ապագա բանաստեղծը տարվել է անգլերենի ուսումնասիրությամբ և ուզել է բանաստեղծ դառնալ։ Բայց արդյունքում լսել է պապին, որը նրան ասել է` հայերն առանց այդ էլ շատ բանաստեղծներ ունեն, լրագրողներ են պետք, որոնք աշխարհին կպատմեն հայերի պատմությունը։
Դիանա Տեր-Հովհաննիսյանը սովորել է Բոստոնի և Հարվարդի համալսարաններում։ Դասավանդել է Բոստոնի ուսումնական հաստատություններում։ Որպես լրագրող աշխատել է ամերիկյան թերթերում։ Լույս է ընծայել բանաստեղծությունների ժողովածուներ՝ «Ինչպես ընտրես քո անցյալը» (1978), «Ժամանակի մասին» (1987), «Հացի երգը, աղի երգը» (1990)։ Եղել է Նոր Անգլիայի բանաստեղծների միության նախագահը։
Անգլերեն է թարգմանել Դանիել Վարուժանի, Եղիշե Չարենցի, Գևորգ Էմինի, Նահապետ Քուչակի, Գրիգոր Նարեկացու ստեղծագործություններից։ Հիմնել է Դանիել Վարուժանի անվան մրցանակ։ 1985 թվականին Երևանում Գևորգ Էմինի և Վահագն Դավթյանի թարգմանությամբ լույս է տեսել նրա «Սև աչքեր` կանաչ աչքերի խորքում» բանաստեղծությունների գիրքը, 1996 թվականին՝ «Ծաղիկների հովիտ»-ը։ 1994 թվականին և 1999 թվականին դասախոսություններ է կարդացել Երևանի պետական համալսարանում:
