ԵՐԵՎԱՆ, 3 մարտի — Sputnik. Թույլ և հիվանդ մարդիկ պարտավոր չեն դեղատոմս ստանալու համար գնալ պոլիկլինիկա։ Այս մասին Sputnik Արմենիայի թղթակցին ասաց Հայաստանի առողջապահության փոխնախարար Սերգեյ Խաչատրյանը։
Մարտի 1-ից մի շարք դեղեր (այդ թվում՝ ցավազրկողները և հակաբիոտիկները) կվաճառվեն միայն դեղատոմսով։ Իսկ ի՞նչ անեն նրանք, ովքեր չեն կարող ինքնուրույն հասնել պոլիկլինիկա։
«Կան անկողնային հիվանդներ, որոնք չեն կարող ինքնուրույն տեղաշարժվել կամ կարող են, բայց դժվարությամբ։ Այդ դեպքում բուժող բժիշկը, որի մոտ գրանցված է հիվանդը, պարտավոր է այցելել նրանց տներ։ Միաժամանակ նման դեպքերում բժիշկը չպետք է լրացուցիչ վճար վերցնի», — ասաց Խաչատրյանը։
Նշենք, որ առողջապահության նախարարի հրամանի համաձայն` պոլիկլինիկայի բուժող բժիշկը տուն գնալու անվճար կանչ է ընդունում, եթե հիվանդն ի վիճակի չէ անձամբ գնալ պոլիկլինիկա (գամված է անկողնուն կամ ֆիզիկապես անկարող է՝ կապված շարժողական գործառույթի խանգարման հետ կամ բարձր ջերմություն ունի)։ Հիվանդի այդ վիճակի մասին պետք է լինի հիմնավորում, որի կարգը նշված չէ։
Փոխնախարարի խոսքով` առողջապահության նախարարությունը լրացուցիչ բացատրություններ կներկայացնի մոտ ապագայում։
