ԵՐԵՎԱՆ, 2 մարտի — Sputnik. Հայաստանն ազատվեց պատրանքներից` հրաժարվելով Թուրքիայի հետ արձանագրություններից։ Այդ մասին մամուլի ասուլիսի ընթացքում հայտարարեց ՀՅԴ Բյուրոյի Հայ Դատի և քաղաքական հարցերի գրասենյակի պատասխանատու Կիրո Մանոյանը։
«Մեր կուսակցությունը ողջունում է Ցյուրիխում ստորագրված արձանագրությունների չեղարկման մասին որոշումը։ Մենք միշտ համոզված ենք եղել, որ այդ փաստաթղթերը սպառնում են մեր ազգային շահերին։ Հիմա այդ սպառնալիքը չկա», — ասաց Մանոյանը։
Նրա համոզմամբ` արձանագրությունները փաստացի արձանագրում էին, որ Հայաստանը ճանաչում է Թուրքիայի հետ ունեցած ներկա սահմանը և հրաժարվում Օսմանյան կայսրությունում իրականացված Հայոց ցեղասպանության միջազգային ճանաչումից. դա այն է, ինչին ձգտել և ձգտում է Անկարան։
Մանոյանը կարծում է, որ հայ-թուրքական հարաբերությունների կարգավորման գործընթացի տապալման պատասխանատվության իր բաժինն ունի նաև միջազգային հանրությունը, մասնավորապես, այն երկրներն ու կազմակերպությունները, որոնք ակտիվորեն աջակցել են «ֆուտբոլային դիվանագիտությանը»` ԱՄՆ-ն, Եվրամիությունը և այլն։
Իսկ վերջին տարիներին Արևմուտքը համարել է, որ Թուրքիայի հետ հարաբերությունների կարգավորումն անհնար է առանց ղարաբաղյան հակամարտության կարգավորման։ Եվ դա այն դեպքում, որ Ցյուրիխյան արձանագրություններն արձանագրել են երկխոսության հաստատում առանց նախապայմանների և այլ տարածաշրջանային խնդիրների հետ կապելու։
ՀՅԴ ներկայացուցիչը փաստեց, որ զուտ տնտեսական տեսանկյունից Հայաստանը պատրաստ չէր հարաբերությունների կարգավորման։ Սահմանի հիպոթետիկ բացումը մեծ վնաս կհասցներ հայկական արդյունաբերությանը։
Հիշեցնենք, որ Հայաստանի Հանրապետության նախագահ Սերժ Սարգսյանը մարտի 1-ին ՀՀ նախագահական նստավայրում կայացած Ազգային անվտանգության խորհրդի նիստում հայտարարել է հայ-թուրքական արձանագրությունները չեղարկելու մասին:
