ԵՐԵՎԱՆ, 2 Մարտի — Sputnik. Հնարամիտ հայերը գումար աշխատելու նոր տարբերակ են գտել կամ նոր կանոնակարգմանը հումորով են արձագանքում` մինչ մյուսները խուճապի մատնված փորձում են իրենց անհրաժեշտ դեղերի պահուստ հավաքել։ Սոցիալական կայքերում արդեն հայտարարություններ են հայտնվել, որտեղ օգտատերերն առաջարկում են էժան դեղատոմսեր։
Առաջարկողներից մեկն էլ հայտնի հումորային դերասան, շոումեն, պրոդյուսեր Մկրտիչ Արզումանյանն է։
«Կես գնով ռեցեպտներ։ Էստի՜ համեցեք »,- գրել է Մկոն Instagram-ի իր էջում` հրապարակելով վաղեմի սքեչերից մի լուսանկար, որտեղ նա բժշկի համազգեստով է։ Հավանաբար հումորիստը ակնարկում է մասնագետների այն մտահոգությունը, որ «Դեղերի մասին» նոր օրենքի կանոնակարգումը կոռուպցիոն ռիսկեր կառաջացնի ոլորտում, և բժիշկները բանուգործը թողած` կսկսեն դեղատոմսերի բիզնեսով զբաղվել։
