ԵՐԵՎԱՆ, 2 մարտի — Sputnik. Երկու երկրի գործադիր իշխանությունների ղեկավարների առանձնազրույցից ու պատվիրակությունների`ընդլայնված կազմով հանդիպումից հետո վարչապետները հանդես կգան հանդիպման արդյունքներն ամփոփող հայտարարություններով:
ՀՀ վարչապետ Կարեն Կարապետյանը հատուկ ընդգծեց, որ հանդիպումն անցել է «շատ ջերմ, կառուցողական մթնոլորտում», քննարկվել են երկկողմ և տարածաշրջանային հարաբերությունները։
«Խոսել ենք մեր համագործակցության հնարավոր ուղղությունների մասին, այդ թվում` Մեղրու ազատ տնտեսական գոտու։ Մանրամասն խոսել ենք և այսօր շարունակում ենք խոսել, թե ինչպես ենք շարժվելու առաջ էներգետիկայի և տրանսպորտի ոլորտում, շատ մանրամասն խոսել ենք առողջապահության և զբոսաշրջության մասին, խոսել ենք, որ չափազանց կարևոր է, պայմանավորվել ենք քայլեր ձեռնարկել, որպեսզի մեր երկու բարեկամ երկրների միջև շփումը ինտենսիվացնենք, խոսել ենք և մեր վերաբերմունքն ենք դրսևորել Վրաստանի իշխանությանը` պատմամշակութային ժառանգության և պահպանման վերաբերյալ»,- ներկայացնելով առանձնազրույցի և երկու երկրների պատվիրակությունների հանդիպմանը քննարկված հարցերի շրջանակը` նշեց Կարեն Կարապետյանը։
ՀՀ վարչապետը նաև շեշտեց, որ բանակցություններից դուրս են եկել բավականին լավ տրամադրությամբ, քանի որ ռեալ ուրվագծել են երկկողմ հարաբերությունների հետագա համագործակցության ուղղությունները։
Կարապետյանը նշեց նաև, որ երկու երկրների տնտեսական հարաբերություններում այս տարի բավական մեծ աճ է գրանցվել։
«Բայց մեր ներուժը շատ ավելի մեծ է»,- ասաց ՀՀ վարչապետը։
Վրաստանի վարչապետ Գիորգի Կվիրիկաշվիլին իր խոսքում նշեց, որ անցյալ տարի Հայաստանն ու Վրաստանը նշել են երկկողմ հարաբերությունների հաստատման 25-ամյակը` վստահություն հայտնելով, որ երկու երկրների համատեղ ուղին շարունակվելու է։
Վրաստանի վարչապետը ևս նախանշեց էներգետիկան, մշակույթը, զբոսաշրջությունը, տնտեսությունը` որպես հետագա համագործակցության կարևորագույն ուղղություններ։
«Վրաստանը պատրաստ է Հայաստանի հետ ավելի ակտիվացնել իր մասնակցությունը այն բազմակողմանի տարածաշրջանային նախագծերում, որոնց մասնակից է Հայաստանը»,- ասաց Կվիրիկաշվիլին` վստահություն հայտնելով, որ թե՛ Հայաստանը, թե՛ Վրաստանը կարող են շահել բոլոր այն ազատ առևտրային ցանցերից, որոնց մասնակցում են երկու երկրներից յուրաքանչյուրը։
Վրաստանի վարչապետը ողջունեց նաև ԵՄ հետ համաձայնագրի Հայաստանի ստորագրումը, ինչպես նաև Հայաստանի կառավարման համակարգի բարեփոխումները։ Կվիրիկաշվիլին շնորհավորեց Արմեն Սարգսյանի` ՀՀ նախագահի պաշտոնում ընտրությունը`բարին մաղթելով Հայաստանում ընթացող իշխանական բարեփոխումների ընթացքին։
Վրաստանի վարչապետը հայտնեց նաև, որ 2018-ին նախատեսվում է տնտեսական համաժողով կազմակերպել Հայաստանի և Վրաստանի պետական մարմինների ու գործարար շրջանակների մասնակցությամբ։
Վրաստանի վարչապետը հայաստանյան այցի շրջանակում այսօր կայցելի նաև Ծիծեռնակաբերդի հուշահամալիր, հարգանքի տուրք կմատուցի Հայոց ցեղասպանության զոհերի հիշատակին, կհյուրընկալվի նաև «Թումո» ստեղծարար տեխնոլոգիաների կենտրոնում:
