ԵՐԵՎԱՆ, 1 մարտի — Sputnik. Հայաստանի խորհրդարանի պատգամավորները մեկ րոպե լռությամբ հարգանքի տուրք մատուցեցին Երևանում 2008 թվականի մարտի 1-2-ը տեղի ունեցած դեպքերի զոհերին։
Լռության րոպեն հայտարարեց ԱԺ նախագահ Արա Բաբլոյանը։
«Առաջարկում եմ մեկ րոպե լռությամբ հարգել Մարտի 1-ի ցավալի իրադարձությունների 10-րդ տարելիցը», — ասաց նա։
Հիշատակի խոսքեր ասաց նաև ՀՀ նախագահի թեկնածու Արմեն Սարգսյանը, որը խորհրդարան էր ժամանել ծրագրային ելույթի համար։
«Տասը տարի առաջ մեր երկիրը մեծ կորուստներ կրեց, ես ևս ուզում եմ հարգել զոհվածների հիշատակը», — ասաց նա։
Հիշեցնենք, որ 2008 թվականի մարտի 1-2-ի դեպքերը տեղի ունեցան այն բանից հետո, երբ Լևոն Տեր-Պետրոսյանի համախոհները հրաժարվեցին ճանաչել նախագահական ընտրությունների արդյունքները։ Մի քանի հազար մարդ տասը օր գիշերեցին Ազատության հրապարակում։ Մարտի 1-ի առավոտյան նրանց ցրեց ոստիկանությունը։ Ցուցարարներին հետապնդեցին մինչև Մյասնիկյանի արձան, որտեղ էլ նրանց ուղղությամբ կրակ բացեցին։ Տասը մարդ զոհվեց, այդ թվում` երկու զինծառայող։ Մեղավորները մինչև այսօր չեն ստացել իրենց պատիժը։
