ԵՐԵՎԱՆ, 1 մարտի — Sputnik. Երևանը «Պատմամշակութային ժառանգության քաղաք» անվանակարգում արժանացել է հեղինակավոր Financial Times պարբերականի ԷֆԴիԱյ ապագայի զբոսաշրջային ուղություններ 2017/18` «Խմբագրի ընտրություն» մրցանակին:
Այս մասին տեղեկացնում են Երևանի քաղաքապետարանի աշխատակազմի տուրիզմի բաժնից։
«Քաղաքում պատմամշակութային զբոսաշրջության և հանգստի ենթակառուցվածքների ներդրողների համար կան բազմաթիվ հնարավորություններ: «Էրեբունի» պատմահնագիտական արգելոցի թանգարանի վերականգնումը այդ հնարավորություններից մեկն է», — նշել է պարբերականը:
Քաղաքապետարանի տարածած հաղորդագրության մեջ նշվում է, որ Երևանը բարձր է գնահատվել նաև Միջազգային համագործակցության անվանակարգում մրցանակի շնորհման քննարկումների ժամանակ՝ շնորհիվ օտարերկրյա ներդրողների համար աշխարհի քարտեզում պատշաճ տեղ գրավելուն ուղղված ջանքերի: Երևանը համագործակցում է աշխարհի ավելի քան 50 քաղաքների հետ և ութ միջազգային կազմակերպությունների անդամ է: Ներկայումս աշխատանքներ են տարվում քույր քաղաքների և գործընկեր քաղաքների հետ համագործակցության ընդլայնման ուղղությամբ:
