ԵՐԵՎԱՆ, 28 Փետրվար — Sputnik. Հայտնի իսրայելցի բլոգեր Ալեքսանդր Լապշինը հերթական անգամ փորձում է ադրբեջանցիներին հիստերիայի հասցնել։ Նա իր շապիկի վրա հայ զինվորի նկար է տպել, ապա հագել այն, լուսանկարվել և նկարը տեղադրել Facebook սոցիալական ցանցի իր էջում։
Նկարի տակ Լապշինը գրել է. «Ընկերներ հավանո՞ւմ եք իմ նոր շապիկը։ Այն շատ յուրահատուկ է։ Ի՞նչ եք կարծում` որ երկրի բանակի զինվորն է պատկերված նրա վրա։ Միանգամից ասեմ` նկարում ես չեմ. իսրայելական բանակում ես «Կալաշնիկով» չեմ ունեցել։ 2–րդում տեղադրում եմ նկարի օրիգինալ տարբերակը»։
Նկարն արդեն հարյուրավոր հավանումներ, կիսումներ ու մեկնաբանություններ ունի։ 2014թ–ին լուսանկարիչ Վարդան Պետրոսյանի կողմից արված ու հայտնի դարձած «Ժպտացող զինվորը» լուսանկարը, բնականաբար, միանգամից ճանաչում են հայ օգտատերերն ու շնորհակալություն հայտնում Լապշինին։ Այլազգիները տարբեր պատասխաններ են տալիս։
Հիշեցնենք` Լապշինը երեք տարվա ազատազրկման էր դատապարտվել առանց Ադրբեջանի իշխանության հետ համաձայնեցնելու Արցախ այցելելու համար։
2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու և Լապշինին հանձնելու մասին:
Լապշինը 3 տարվա ազատազրկման դատապարտվեց առանց Ադրբեջանի իշխանության հետ համաձայնեցնելու Արցախ այցելելու համար:
Ավելի ուշ Ադրբեջանի նախագահ Իլհամ Ալիևը Լապշինին ներում շնորհելու մասին հրամանագիր ստորագրեց։
