ԵՐԵՎԱՆ, 27 փետրվարի — Sputnik. ԽՍՀՄ ժողովրդական արտիստ Արմեն Ջիգարխանյանը մտադիր է իր նախկին կին Վիտալինա Ցիմբալյուկ-Ռոմանովսկայայից 15 միլիոն ռուբլի հետ վերցնել։ Այս մասին «Կոմսոմոլկայա պրավդային» հայտնել է դերասանի փաստաբան Եվգենի Պարֆյոնովը։
Նրա խոսքով` Արմեն Բորիսովիչի ներկայացուցչի խոսքով` փետրվարի 22-ին Ջիգարխանյանն ու «Սֆերա» ընկերության տնօրեն Յուրի Ռաստեգինը կնքել են մի համաձայնագիր, որը թույլ է տալիս լուծել բոլոր տարաձայնությունները։
Պարբերականի տվյալով` արտիստը Ստարոկոնյուշենի նրբանցքում գտնվող բնակարանի իր մասնաբաժինը վաճառել էր այդ ընկերությանը։ Պայմանագրի համաձայն` «Սֆերան» պետք է Ջիգարխանյանին 15 միլիոն ռուբլի փոխանցեր, սակայն փաստացիորեն Ջիգարխանյանին 7,9 միլիոն ռուբլի են փոխանցել։
Պարֆյոնովը նաև հայտնել է, որ գործարքը կեղծ է եղել, որի նպատակը եղել է մեկ այլ գործարք քողարկելը։
«Կոմսոմոլսկայա պրավդան» գրում է, որ անշարժ գույքը երկու սեփականատեր ունի, մեկը Ջիգարխանյանի նախկին կինն է` Տատյանա Վլասովան։ Ընտանեկան դրամայի ընթացքում Վիտալինային հաջողվել է Արմեն Բորիսովիչի հաշվից լիազորագրով 4 միլիոն ռուբլի հանել, իսկ մնացած գումարը կանխիկ է վերցրել։
Փաստաբանը պնդում է, որ Վիտալինան «հաջողացրել է ժողովրդական արտիստի ունեցվածքի հետ խարդախութուն անել»։ Ցիմբալյուկը կարողացել է Ջիգարխանյանի բնակարանի ու փողերի հասանելիություն ստանալ։
«Արմեն Բորիսովիչն այդ գումարը չի ստացել։ Կարծում ենք` նրա նախկին կինն է հափշտակել 15 միլիոն ռուբլին։ Հիմա մտադիր ենք այդ գումարը Վիտալինա Ցիմբալյուկ-Ռոմանովսկայայից ստանալ», — ասել է փաստաբանը` մեղադրելով արտիստի նախկին կնոջը ՌԴ ՔՕ 159 հոդվածով (խարդախություն)։
Ժողովրդական արտիստի հետ կապված աղմկահարույց պատմությունը ծագել է դեռ անցած տարվա հոկտեմբերին։ Սկզբում լուրեր պտտվեցին, թե անհայտ անձինք Ջիգարխանյանին առևանգել են, հետո պարզվեց, որ նա հիվանդանոցում է։
Մի քանի ամիս շարունակ հասարակությունը քննարկում է Արմեն Ջիգարխանյանի ու նրա երիտասարդ կնոջ շուրջ ծավալված սկանդալը։ Դերասանը հայտարարել է, որ կինը խաբեությամբ յուրացրել է փողերը, իր անունով դարձրել անշարժ գույքն ու մահափորձ կազմակերպել։ Վիտալինան իր հերթին հայտարարել է, որ որևէ հարցում մեղավոր չէ, ավելին` նա կատարվածի համար մեղադրում է Ջիգարխանյանին շրջապատող մարդկանց։
