ԵՐԵՎԱՆ, 26 փետրվարի — Sputnik. Արցախյան հակամարտության գոտում իրավիճակն առաջիկայում կարող է սրվել, ինչը կապված է Ադրբեջանում կայանալիք նախագահական ընտրությունների հետ։ Sputnik Արմենիայի եթերում նման կարծիք հայտնեց ռազմական փորձագետ Հայկ Նահապետյանը։
Նրա խոսքով` Իլհամ Ալիևի շուրջ ընտրազանգված հավաքելու նպատակով իշխանությունները կփորձեն կրկին խաղարկել արցախյան քարտը` ի դեմս Հայաստանի արտաքին թշնամի ստեղծելու համար։ Փորձագետի կարծիքով` միաժամանակ լայնամասշտաբ մարտական գործողություններ չեն լինի։
«Անշուշտ, ամերիկացիները չեն կարող առիթը բաց թողնել և չփորձել նոր գլխացավանք ստեղծել ռուսական ղեկավարության համար` Ռուսաստանի սահմանների երկայնքով «թեժացնելով» հակամարտության կետերը։ Արցախում իրավիճակի սրումը կարող է դառնալ ամերիկացիների կողմից Վլադիմիր Պուտինին մատուցվող նախընտրական կամ հետընտրական «անակնկալներից» մեկը»,- ասաց Նահապետյանը։
Այդ վտանգը գոյություն ունի ոչ միայն Հարավային Կովկասում, այլ նաև Ուկրաինայի հարավ-արևելքում, Կենտրոնական Ասիայում, Սիրիայում, որտեղ իրավիճակը վերջին օրերին կրկին սրվել է։
Փորձագետի կարծիքով` Արցախում մարտական գործողությունների վերսկսումը կստեղծի մի այնպիսի իրավիճակ, որ հակամարտությանը կարող է միջամտել նաև ՀԱՊԿ-ն։ Հայաստանի նախագահը բազմիցս հայտարարել է, որ նոր պատերազմի դեպքում Հայաստանը ռազմական միություն կկնքի Արցախի հետ և նրան ռազմական օգնություն կցուցաբերի։ Այդ դեպքում Երևանը նույնպես կհամարվի հակամարտության կողմ։ Լինելով ՀԱՊԿ անդամ` Հայաստանը լիակատար իրավունք ունի հույսը դնել ՀԱՊԿ-ի օգնության վրա։
Ադրբեջանի կողմից հակամարտությանը կմիջամտի Թուրքիան, որը երբեք չի թաքցրել արցախյան հարցում ունեցած հակահայկական դիրքորոշումը։
«Թուրքիայի մեջքին, ինչպես հայտնի է, կանգնած է ՆԱՏՕ-ն։ Հիմա հարց է ծագում, թե պատրա՞ստ են արդյոք ուժային կենտրոններն այդքան մասշտաբային հակամարտության։ Կարծում եմ, որ ոչ», — ասաց նա։
Նրա խոսքով` հետևաբար իմաստ չունի լայնածավալ մարտական գործողություններ կանխատեսել Արցախում։
