ԵՐԵՎԱՆ, 23 փետրվարի — Sputnik. Եթե Գառնու «Քարերի սիմֆոնիայի» տարածքում կառուցվող շինությունն ապօրինի է, դրա համար պետք է պատասխանատվություն կրեն համապատասխան մարմինները։ Այս մասին այսօր լրագրողների հետ հանդիպմանն ասաց ՀՀ Տարածքային կառավարման և զարգացման նախարար Դավիթ Լոքյանը` հավելելով, որ հարցն ուսումնասիրելու ցուցում է տվել Կոտայքի մարզպետին ու Գառնիի գյուղապետին։
Իսկ մինչ այդ նախարարն արդեն ճշտել է` Գառնու գյուղապետը շինարարության թույլտվություն չի տվել։
«Այդ տարածքում առանց թույլտվության շինարարություն իրականացնելն, իհարկե, ինձ համար ընդունելի չէ, և համապատասխան միջոցներ պետք է ձեռնարկվեն»,- ասաց նա` նշելով, որ դրանում մեղավոր են և՛ համայնքի ղեկավարը, և համապատասխան տեսչությունները, որոնք այն նկատել են արդեն կառուցումից հետո։
Նախարար Լոքյանը նաև հայտնեց, որ շինությունը պետք է սրճարան դառնար և նախատեսված էր հուշարձանի այցելուներին սպասարկելու համար։
Նշենք, որ «Ֆեյսբուք» սոցիալական ցանցի օգտատերերն ահազանգել էին Գառնու կիրճում գտնվող «Քարերի սիմֆոնիայի» մոտ շինարարական աշխատանքների մասին` տարածելով դրանք ապացուցող լուսանկարներ։
Շինարարության մասին ահազանգը ստանալուց հետո Բնապահպանական տեսչության աշխատակիցները մեկնել են տարածք և կասեցրել շինաշխատանքները։
