ԵՐԵՎԱՆ, 22 փետրվարի — Sputnik. Մոսկվայում մեկնարկած «Աէրոֆլոտ օփեն» շախմատային փառատոնի գլխավոր A մրցաշարում գրոսմայստեր Տիգրան Պետրոսյանը երկրորդ անընդմեջ հաղթանակը տարավ և երկու տուրից հետո զբաղեցնում է 6-րդ տեղը: Այս մասին հայտնում է Հայաստանի ազգային օլիմպիական կոմիտեի մամուլի ծառայությունը։
Հայաստանի մյուս ներկայացուցիչներն ունեն հետևյալ արդյունքները. Արման Միքայելյան՝ 1.5 միավոր (22-րդ տեղ), Գաբրիել Սարգսյան, Հայկ Մարտիրոսյան, Մանուել Պետրոսյան, Արամ Հակոբյան՝ 1-ական (32, 42, 49, 64), Շանթ Սարգսյան՝ (92):
Երրորդ տուրում Հակոբյանն ու Մարտիրոսյանը կխաղան միմյանց հետ:
«Աէրոֆլոտ օփեն» շախմատային փառատոնը, որի շրջանակում երեք մրցաշար է անցկացվում, մեկնարկել է փետրվարի 20-ին Մոսկվայում:
Գլխավոր A մրցաշարում (մասնակցում են 2549 և ավելի վարկանիշ ունեցող շախմատիստները) հանդես են գալիս Հայաստանի հավաքականի անդամներ Գաբրիել Սարգսյանը և Հայկ Մարտիրոսյանը, գրոսմայստերներ Մանուել Պետրոսյանը, Տիգրան Պետրոսյանը, Արման Միքայելյանը, միջազգային վարպետներ Արամ Հակոբյանը և Շանթ Սարգսյանը:
