ԵՐԵՎԱՆ, 21 փետրվարի — Sputnik. Որևէ հայ դիվանագետ չի մասնակցել Էստոնիայում անցկացված «Դիվանագետի գավաթ» ամենամյա բարեգործական ֆուտբոլային մրցաշարի ժամանակ իբրև թե հայ և վրացի դիվանագետների միջև տեղի ունեցած կռվին։ Այս մասին Facebook-ի իր էջում գրել է Լիտվայում և համատեղությամբ Լատվիայում ու Էստոնիայում Հայաստանի դեսպան Տիգրան Մկրտչյանը։
Ինչպես նշել է Մկրտչյանը` թեև մրցաշարը կրում է «Դիվանագետի գավաթ» հրապուրիչ անվանումը, բայց մասնակցող թիմերը հիմնականում բաղկացած են լինում տեղի համայնքների ներկայացուցիչներից
«Նշված խաղին մասնակցել է մեր սիրելի էստոնահայ համայնքի ներկայացուցիչներից բաղկացած թիմը, որն, ի դեպ, նախորդ տարվա չեմպիոնն է։ Իսկ մեր բարեկամ Վրաստանի թմում եղել է ընդամենը մեկ դիվանագետ։ Տեղի ունեցածն էլ ֆուտբոլում շատ հաճախ հանդիպող լեզվակռիվ է եղել, որը շատ արագ հղկվել է«,- գրել է դեսպանը։
Դիվանագետը նաև հավելել է, որ Էստոնիայում հայ և վրացի դիվանագետները որևէ ֆուտբոլային առնչություն չեն ունեցել։
Հիշեցնենք, որ երեկ` փետրվարի 20-ին, Sputnik Estonia-ն տեղեկատվություն էր տարածել, թե Էստոնիայում անցկացվող «Դիվանագետի գավաթ» ամենամյա բարեգործական ֆուտբոլային մրցաշարի ընթացքում վրացի և հայ դիվանագետները կռվի են բռնվել։ Սույն ապատեղեկատվությունը տարածվել էր նաև հայկական, վրացական և ադրբեջանական մեդիա դաշտերում։
Նշվել էր նաև, որ Հայաստանի խաղացողի դեմ կոպիտ սխալը հանգեցրել է նրան, որ նույնիսկ երկու թիմերի երկրպագուները նետվել են խաղահրապարակ։ Երկու թիմերի խաղացողներին տրված կարմիր քարտերը հանդարտեցրել են կրքերը, իսկ Վրաստանը, որն այդ պահին 1։0 հաշվով առաջատար է եղել, տուգանային հարվածի հետևանքով գնդակ է ընդունել սեփական դարպասը։
Արդյունքում հաղթողին որոշել է խաղից հետո 11-մետրանոցների շարքը։ Խաղացողները իրացրել են հարվածները մինչև առաջին բացթողումը, և միայն հինգերորդ հարվածի ժամանակ հայ ֆուտբոլիստը սխալվել է։ Նրա վրացի մրցակիցը դիպուկ է եղել, և ամեն տարի Դիվանագետների գավաթի հաղթողի կոչմանը ձգտող Վրաստանը վերջապես իրականություն է դարձրել իր երազանքը։
