ԵՐԵՎԱՆ, 21 փետրվարի — Sputnik. Մոդել Անաստասիա Վիվտաշը, որը կներկայացնի Հայաստանը Miss Supermodel միջազգային մրցույթում, դժվարանում է պատասխանել ազգային պատկանելությանը վերաբերող հարցին։
Miss Supermodel մրցույթը տեղի կունենա մարտի 15-23-ը Դելիում, որին կմասնակցեն 52 երկրի ներկայացուցիչներ։
Նա Sputnik Արմենիային պատմել է հայ-հրեական արմատների, նախասիրությունների և երազանքի մասին։
«Ես կիսով չափ հրեա եմ, կիսով չափ` հայ։ Մարդիկ ինձ միշտ ասում են, որ «դու իսկական հրեա ես»։ Բարդ է պատասխանել այն հարցին, թե ես ինչ եմ զգում… Հիմա Հայաստանում ես ինձ հայուհի եմ զգում, իսկ Իսրայելում` հրեուհի։ Ցավոք, ես հրեերեն չգիտեմ։ Ծնվել եմ Ռուսաստանում, մայրս ռուսաստանցի հրեա է», — նշեց Անաստասիան։
Հիմա նա սովորում է Երևանի թատրոնի և կինոյի պետական ինստիտուտի վերջին կուրսում, զբաղվում է ֆիթնեսով, լողով և լեզուներ է ուսումնասիրում։
Sputnik Արմենիայի զրուցակիցն ասաց, որ մրցույթին մասնակցելը մեծ փորձ է։ Թեև նրա հարազատները կատակում են, որ եթե առաջին տեղը չզբաղեցնի, կարող է չվերադառնալ։
Անաստասիան արդեն հասցրել է տեսնել մրցույթի մասնակիցներից շատերին, բայց դժվարանում է դատել ըստ սոցիալական ցանցերի լուսանկարների, քանի որ իրականում մրցակիցները կարող են այլ տեսք ունենալ։
«Ժամանակակից մոդելներից շատերը խիստ փչացնում են իրենց արտաքինը, բազմաթիվ վիրահատությունները խանգարում են տեսնել նրանց բնական գեղեցկությունը», — կարծում է Վիվտաշը։
Անաստասիան երբեք չի մտածել, որ պրոֆեսիոնալ մոդել կդառնա։ Նա ձգտում է դրսևորվել որպես դերասան, բայց այնպես է ստացվում, որ հաջողությունը հետապնդում է հենց մոդելային բիզնեսում։
Miss Supermodel Worldwide գեղեցկության մրցույթի ազգային տնօրեն Յանա Գրիգորյանը Sputnik Արմենիայի հետ զրույցում պատմեց, որ մոտավորապես երկու շաբաթ առաջ քաստինգ է անցկացրել հայ գեղեցկուհիների շարքում։
«Ժամանակը քիչ էր մասնակից գտնելու համար։ Արդյունքում մենք ընտրեցինք Անաստասիային, նա 23 տարեկան է։ Չափանիշները պետք է լինեն 90х60х90, իսկ հասակը` առնվազն 170։ Դրանք համընդհանուր չափանիշներ են, թեև վերջին շրջանում շատ գեղեցկության մրցույթներում մի քիչ հեռացել են դրանցից», — նշեց Յանան։
Նա ավելացրեց` ուրախ է, որ Անաստասիան համաձայնել է ներկայացնել մեր երկիրը։
Յանան նշեց, որ Miss Supermodel Worldwide-ում կլինեն ավանդական փուլեր` ելույթ լողազգեստով, ազգային հագուստով (հայ մասնակիցը` տարազով) և երեկոյան զգեստով։ Մրցույթը հագեցած է, կլինեն էքսկուրսներ հնդկական քաղաքներով, հետաքրքիր ծրագիր և քիչ ժամանակ քնելու համար։
