ԵՐԵՎԱՆ, 21 փետրվարի — Sputnik. Պաշտոնական այցով Հայաստանում գտնվող Լիբանանի նախագահ Միշել Աունի գլխավորած պատվիրակությունն այսօր հարգանքի տուրք է մատուցել Հայոց ցեղասպանության զոհերի հիշատակին` «Ծիծեռնակաբերդ» հուշահամալիր այցելելով։
Լիբանանի նախագահը Հայոց ցեղասպանության թանգարան–ինստիտուտի հուշամատյանում հուզիչ գրառում է թողել։
«Այն ինչ տեսա այս թանգարանում որպես լուսանկար կամ փաստաթուղթ, պատմում են հայ ժողովրդի արյունոտ անցյալի մասին, որի նմանը չկա պատմության մեջ։ Սա ինձ կրկին ստիպում է վերահաստատել իմ միտքը, որ պետք է իրականանա Հայ դատին պահանջը, որպեսզի մաքրվի հիշողությունը և վերականգնվի վստահությունը, որ արդարությունը պիտի հաղթի չարին։
Ողջուններս հայ ժողովրդին, որ անցնելով ցեղասպանության, աղետների ու դժվարությունների միջով, կարողացավ ստեղծել մի հայրենիք, որով կարելի է հպարտանալ։ Այն իր դարավոր քաղաքակրթության կրողն է ու պայքարում է ավելի լավ ապագայի համար»,–գրել է Լիբանանի նախագահը։
Նախագահի պաշտոնը ստանձնելուց հետո Միշել Աունը պաշտոնական այցով առաջին անգամ է Երևան այցելում։ Լիբանանի պատվիրակության կազմում են ՆԳՆ ղեկավար Նուհադ Ալ Մաշնուկը, ԱԳՆ ղեկավար Ջեբրան Բասիլը, զբոսաշրջության նախարար Ավետիս Կիտանյանը, արդյունաբերության նախարար Հուսեյն Հաջ Հասանը, ինչպես նաև Դաշնակցություն կուսակցությունից Լիբանանի խորհրդարանի հայազգի պատգամավոր Հակոբ Բագրատունին։
Երևանում Աունը կհանդիպի իր հայ գործընկեր Սերժ Սարգսյանի, ինչպես նաև վարչապետ Կարեն Կարապետյանի և ԱԺ նախագահ Արա Բաբլոյանի հետ։ Հայաստանի և Լիբանանի առաջնորդները վերջին անգամ հանդիպել են 2012 թվականի նոյեմբերին Բեյրութ Սերժ Սարգսյանի այցի ընթացքում։
