ԵՐԵՎԱՆ, 19 փետրվարի — Sputnik. Երևանի քաղաքապետարանում, ավագանու նիստի ժամանակ տեղի ունեցած ծեծկռտուքի փաստով հարուցվել է քրեական գործ։ Այս մասին Sputnik Արմենիային հայտնեցին ՀՀ քննչական կոմիտեից։
Քրեական գործը հարուցվել է Քրեական օրենսգրքի 258-րդ և 118-րդ հոդվածների 1-ին մասերով, այն է` ծեծ կամ այլ բռնի գործողություններ կատարելը, որն առողջությանը վնաս չի պատճառել, և խուլիգանություն՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով։
Նշենք, որ երկու հոդվածներն էլ նախատեսում են տուգանք` նվազագույն աշխատավարձի 50-100-ապատիկի չափով, կամ կալանքով՝ առավելագույնը 1-2 ամի ամիս ժամկետով:
Թե ծեծի մասնակիցներից ով ինչ կարգավիճակով է ներգրավվել գործում, առայժմ չի հայտարարվում։ Նշվում է միայն, որ քրեական գործի շրջանակում անհրաժեշտ գործողություններ ձեռնարկելու համար այժմ ուսումնասիրվում են նյութերը։
Հիշեցնենք` փետրվարի 13-ին Երևանի ավագանու նիստի ժամանակ ընդդիմադիր «Երկիր ծիրանի» ավագանու խմբակցության անդամները ապակյա տարաներ էին բերել դահլիճ, որոնք բացելուց հետո դահլիճում գարշահոտություն էր տարածվել։
Նրանք հայտարարել էին, որ Նուբարաշենի 4 շենքի բնակիչներն այդ գարշահոտը շնչում են արդեն մի քանի տարի, քանի որ հարևանությամբ գտնվող «Նուբարաշեն» ՔԿՀ-ի կոյուղատարը վնասվել է, իսկ քաղաքային իշխանույունը միջոցներ չի ձեռնարկում այն վերանորոգելու համար։
Արդյունքում «Երկիր ծիրանի» և ՀՀԿ խմբակցությունների անդամների ու քաղաքապետարանի աշխատակիցների միջև ծեծկռտուք էր սկսվել։
