ՀՀ ֆինանսների նախարարության Միջազգային համագործակցության վարչության միջազգային հարկային և մաքսային հարաբերությունների բաժնի պետ Նաիրուհի Ավետիսյան Sputnik Արմենիայի հետ զրույցում ասաց, որ Իրաքի հետ կրկնակի հարկումը բացառելու համաձայնագիր ունենալու աշխատանքները սկսվել են դեռևս 2014թ.–ից։ «Վերջնական բանակցությունները տեղի են ունեցել անցած տարի, Երևանում, երբ կայացավ հայ–իրաքյան միջկառավարական հանձնաժողովի 2–րդ նիստը, որտեղ և ամրագրվեց, որ կողմերը կձգտեն առավելագույնի` թևակոխելու բանակցային փուլ։ Այսօր բանակցությունների 1–ին փուլն էր։ Բավականին արդյունավետ էր, դիմացի կողմը ևս տրամադրված էր համաձայնության հասնելու»,–ասաց Ավետիսյանը։
Նրա խոսքով` իրաքյան պատվիրակությունը բավականին պատկառելի կազմով է։ Եվ հայկական կողմը հուսով է, որ հենց 1–ին փուլում հնարավոր կլինի հասնել այնպիսի համաձայնագրի, որը առաջիկայում կստորագրվի։
