ԵՐԵՎԱՆ, 17 փետրվարի — Sputnik. Նիդեռլանդների արտաքին գործերի նախարար Սիգրիդ Կաագը հարգում ու գնահատում է խորհրդարանականների ոգևորությունը` Օսմանյան կայսրությունում Հայոց ցեղասպանության ճանաչման վերաբերյալ, սակայն չի մեկնաբանում կառավարության դիրքորոշումը։ Նախարարը հայտնել է, որ մտադիր է այդ հարցը պատգամավորների հետ քննարկել եկող շաբաթ կայանալիք հանդիպման ընթացքում։ Այս մասին հայտնում է NLtimes-ը։
Կաագը չի նաև ցանկացել պատասխանել այն հարցին` արդյո՞ք երկրի կառավարության ներկայացուցիչները մասնակցելու են ապրիլի 24-ին Հայոց ցեղասպանության 103-րդ տարելիցին նվիրված երևանյան միջոցառումներին։
Նիդեռլանդների կառավարությունը դեռ չի ընդունում, որ մեկուկես միլիոն հայերի կոտորածը ցեղասպանություն է և այդ բառը չակերտներով է օգտագործում։ Սակայն, Կաադի խոսքով, նա հասկանում է «սարսափելի ողբերգություն» ապրած ժողովրդի ցավն ու վիշտը։
Հիշեցնենք` Նիդեռլանդների խորհրդարանի ստորին պալատը ճանաչել է Հայոց ցեղասպանությունը։ Նիդեռլանդների խորհրդարանի մյուս որոշմամբ` երկրի պետքարտուղարը պետք է այցելի Ծիծեռնակաբերդի հուշահամալիր և մասնակցի Հայաստանում ապրիլին կայանալիք Հայոց ցեղասպանության հիշատակի արարողությանը:
Մոտ մեկ տարի առաջ Թուրքիայի և Նիդեռլանդների հարաբերությունները սրվել էին։ 2017 թվականի մարտին երկրի իշխանությունները թուրք նախարարներին թույլ չտվեցին քարոզել տեղի թուրքերի շրջանում։ Այն ժամանակ Թուրքիայի ԱԳՆ ղեկավար Մևլյութ Չավուշօղլուն ցանկանում էր կոչ անել նրանց հանրաքվեի ժամանակ քվեարկել հանուն նախագահ Էրդողանի իրավասությունների ընդլայնման։ Սակայն Նիդեռլանդների իշխանությունները ոչ միայն թույլ չտվեցին իրենց տարածքում քարոզել, այլև արգելեցին նրա ինքնաթիռի վայրէջքը։ Այն ժամանակ Էրդողանը Նիդեռլանդների իշխանությանը մեղադրեց նացիզմի մեջ։
