ԵՐԵՎԱՆ, փետրվարի 14 — Sputnik. Հայկական արմատներով գործարար Օլեգ Մկրտչյանը, որին Ռուսաստանում մեղադրում են 100 միլիոն դոլարի խարդախության մեջ, Ռուսաստանի Քննչական կոմիտեին գործարք է առաջարկել։
Ձերբակալված գործարարը պատրաստ է մեղմ պատժի դիմաց ՌԴ Քննչական կոմիտեին պատմել խարդախության սխեմաների և դրանց մասնակիցների մասին։ Նրա խոսքով` Ուկրաինայի անվտանգության խորհրդի նախկին քարտուղար Վիտալի Գայդուկն ու Դոնեցկի մարզի վարչության նախկին ղեկավար Սերգեյ Տարուտան, որը «Դոնբասի արդյունաբերական միություն» կորպորացիայի համասեփականատերն է, կապ ունեն բանկից 100 միլիոն դոլարի վարկը հափշտակելու հետ (վարկը գործարարին տրվել էր 2009 թվականին)։
«Կուբան» ֆուտբոլային ակումբի նախկին սեփականատեր, «Դոնբասի արդյունաբերական միություն» ուկրաինական մետալուրգիական ընկերության գլխավոր տնօրեն Օլեգ Մկրտչյանին ձերբակալել են փետրվարի սկզբին Մոսկվայում։ Մկրտչյանին կասկածում են առանձնապես խոշոր չափի խարդախության մեջ։
Քննության վարկածով` «Վնեշէկոնոմբանկից» հափշտակած գումարի մի մասը դուրս է բերվել Կիպրոսում ու Վիրջինյան կղզիներում գտնվող օֆշորային ընկերությունների միջոցով ու հափշտակվել է Մկրտչյանի անձնական հարստացման համար։
Քննությունը ենթադրում է, որ 2009 թվականին «Դոնբասի արդյունաբերական միություն» ընկերությունը 100 միլիոն դոլարի վարկ է ստացել բանկից` Կրասնոդարի երկրամասի Արմավիր քաղաքում գործարան կառուցելու համար։ Սակայն վարկը ստանալուց հետո Մկրտչյանը կասեցրել է գործարանի կառուցումն ու հափշտակել է գումարը, կարծում է Ռուսաստանի Քննչական կոմիտեն։
Վարկային միջոցների մի մասն էլ նախատեսված է եղել «Դոնբասի արդյունաբերական միության» ձեռնարկությունների վերականգման համար։
Քննության տվյալներով` 2009 թվականին Մկրտչյանը բանկից ևս 8 միլիարդ դոլար է ստացել` որպես «Դոնբասի արդյունաբերական միության» բաժնետոմսերի 50%-ի վճար։
Սակայն քննիչների ներգրաված փորձագետները բաժնետոմսերի փաթեթը գնահատել են երկու անգամ ավելի քիչ, քան իրականում վճարել է բանկը։ Ստացվում է, որ Մկրտչյանը պարզապես գողացել է մոտ 4 միլիարդը։
