ԵՐԵՎԱՆ, 14 փետրվարի — Sputnik. Հայազգի ռուսաստանցի հումորիստ Գարիկ Մարտիրոսյանին ողողել են շնորհավորանքներով։ Այսօր Instagram-ում հանդիսավարի հասցեին շնորհավորանքների նոր տարափ էր։ Ընկերները շարունակում են նրան նշել տարբեր լուսանկարներում` իրենց բարեմաղթանքներով մակագրելով դրանք։
Թերևս նրանցից ամենաստեղծարարը Թիմուր Բատռուդինովն է, ով ընկերոջը շնորհավորել է հայերեն։ «Շնորհավոր տարեդարձդ, «նոր հումորի» հայր։ Ինչ ասես մեր գլխով չի անցել մեր համատեղ հումորային գոյության 16 տարիների ընթացքում։ Եվ թող նման բաներ էլի լինեն»,- ռուսերեն գրել է Բատռուդինովը և հայերեն շարունակել. «Մաղթում եմ ձեզ առողջություն, երջանկություն և 16 ձագ ձուկ: Ես համբուրում եմ այտերը»։
Եվս մեկ քոմեդի ռեզիդենտ Սեմյոն Սլեպակովը գրել է, որ իր սիրելի, ավագ ընկերոջ, ուսուցչի և մի մարդու տարեդարձն է, ում շնորհիվ նա կյանքում առաջին անգամ կապույտ կոշիկներ է տեսել։
«Արդեն 15 տարի է`Գարիկը թեթև հայկական զեփյուռի նման ներխուժեց իմ կյանք և անճանաչելիության աստիճան փոխեց այն։ Գարիկի մեջ զարմանալիորեն համադրվում են տաղանդը, լավատեսությունը և նյութական արժեքների նկատմամբ սերը` պարբերաբար բազմապատկելով միմյանց»,- իր լուսանկարը մակագրել է Սլեպակովը։
Հանդիսավարը հումորով ավելացրել է, որ Գարիկը միլիարդավոր հայ տղաներին և աղջիկներին ապացուցել է, որ կյանքը 75 տարեկանից հետո չի ավարտվում։ Սլեպակովը Գարիկին առողջություն, գեղեցկություն, հանդիսատեսի նվիրված սեր և հումորի անսպառ զգացում է մաղթել, ասելով, որ մնացած ամեն ինչը նա ունի։
Ռուսական հումորի ևս մեկ վարպետ` Գարիկ Խարլամովը Մարտիրոսյանին անվանել է չափազանց տաղանդավոր, համբավավոր, մեծանուն և հզոր։
«Սիրելի Գարիկ», ես քեզ մաղթում եմ այս աշխարհում հնարավոր բոլոր բարիքները։ Որպեսզի քո հարազատներն ու մտերիմները միշտ երջանիկ լինեն։ Շնորհավորում եմ Ժաննային նման ամուսին ունենալու համար, Դանիելին և Ժասիմինին նման հայրիկ ունենալու համար, Արթուր Ջանիբեկյանին նման եղբայր ունենալու համար, ծնողներիդ նման որդի ունենալու համար, Սվետլակովին, Ուրգանտին և Ցեկալոյին նման Մարտիրոսյան ունենալու համար և մեծ հայ ժողովրդին նման հայ ունենալու համար։ Դու իմ երկրպագուն ես, ես քո կուռքը»,- այսպես է մակագրել Խարլամովը Instagram-ում տեղադրած իր լուսանկարը։
Հումարիստն ավելացրել է, որ մեծացել է Մարտիրոսյանի հաղորդումները դիտելով և երջանիկ է, որ կյանքն իրեն հնարավորություն է ընձեռել նրան անվանել «հրաշալի»։ Խարլամովը Մարտիրոսյանին մաղթել է ապրել մինչև ապոկալիպսիս` աշխարհի վերջը։
