ԵՐԵՎԱՆ, 12 փետրվարի — Sputnik. Հայաստանի իշխող հանրապետական կուսակցության շատ անդամներ ցանկանում են տեսնել Սերժ Սարգսյանին վարչապետի պաշտոնում, երկուշաբթի խորհրդարանական ճեպազրույցում ասաց ՀՀԿ խմբակցության ղեկավար Վահրամ Բաղդասարյանը։
«Մենք հասկանում ենք, որ վարչապետ չեն նշանակում ինչ-որ մեկի խնդրանքով։ Բայց Սերժ Սարգսյանի դեպքում ՀՀԿ-ում իսկապես տրամադրված են առաջադրել նրա թեկնածությունը կառավարության ղեկավարի պաշտոնում», — ասաց պատգամավորը։
Բաղդասարյանի խոսքով` անձամբ Սարգսյանը չի հայտարարել վարչապետ դառնալու ցանկության մասին, և այդ հարցի վերաբերյալ դեռ վերջնական որոշում չի ընդունվել։ Բաղդասարյանը կոչ է արել չշտապել կանխատեսումների հարցում և սպասել ՀՀԿ Գործադիր մարմնի քննարկումների արդյունքներին։ Նա նաև չպատասխանեց այն հարցին, թե կիսում է արդյոք Սերժ Սարգսյանի վարչապետի պաշտոնում առաջադրելու «կուսակցության շատ անդամների ցանկությունը»։
Հիշեցնենք, որ ՀՀ նոր սահմանադրության համաձայն` հանրապետության նախագահին ընտրում է խորհրդարանը։ Նախագահը պաշտոնավարում է 7 տարով` առանց վերընտրվելու իրավունքի։
