ԵՐԵՎԱՆ, 9 փետրվարի — Sputnik. Ոստիկանության Կենտրոնական բաժնի հետաքննչական բաժանմունքում նյութեր են նախապատրաստվում երեկ՝ փետրվարի 8-ին, Երևանում տեղի ունեցած անձնական ունեցվածքի գողության փաստով։ Այս մասին հայտնում է shamshyan.com-ը։
Ժամը 05։00-ի սահմաններում Երևան քաղաքի բնակիչներ, 28-ամյա Ստելլա Հ.-ն և Արմինե Գ.-ն Ոստիկանության Կենտրոնական բաժին հայտնել են, որ Զավարյան փողոցի 97 հասցեում գործող «Ծղոտներ» հյուրանոցային համալիրում 2 տղամարդիկ իրենցից գումար են գողացել։
Նրանք ներկայացել են, որ մեկը բժիշկ է, իսկ մյուսն էլ՝ վարչության պետի տեղակալ։
Ոստիկանության Կենտրոնական բաժնի քրեական հետախուզության բաժնի և անչափահասների գործերով բաժանմունքի աշխատակիցները պարզել են, որ նշված անձանցին մեկը Երևան քաղաքի Կ. Ուլնեցու փողոցի բնակիչ, 26-ամյա Մուշեղ Սարգսյանն է, մյուսը` Դիլիջանի բնակիչ, 32-ամյա Ալիկ Աղաջանյանը։
Նրանք ինքնակամ ներկայացրել են Ոստիկանություն, որտեղ Ստելլա Հ.-ն ու Արմինե Գ.-ն հայտնել են, որ նրանք նշված հյուրանոցային համալիրում գումարի դիմաց սեռական հարաբերություններ են ունեցել իրենց հետ, որից հետո վիճաբանել են և հարվածներ են հասցրել իրենց, այնուհետև իրենցից խլել են վճարած գումարը։
Դրանից հետո Արմինեի պայուսակից գողացել են 40 հազար դրամ, իսկ այդ մասին իմանալով՝ Արմինեն սեղանի վրայից վերցրել է Ա. Աղաջանյանի բջջային հեռախոսը։
Ոստիկանություն ահազանգած Ստելլա Հ.-ն Արմինե Գ.-ն արդեն Ոստիկանությունում հրաժարվել են կատարվածի մասին հաղորդում տալուց։ Իսկ Մ. Սարգսյանն ու Ա. Աղաջանյանը ստորագրությամբ ազատ են արձակվել։
Ոստիկանությունում Մ. Սարգսյանը հայտնել է, որ աշխատում է «Նատալի Ֆարմ» ՓԲԸ-ում՝ որպես տարածքային ղեկավար, իսկ Ա. Աղաջանյանը, որ աղջիկների մոտ ներկայացել էր վարչության պետի տեղակալ, ասել է, որ նախկինում աշխատել է «Նատալի Ֆարմ» ընկերությունում՝ որպես մենեջեր, սակայն 1 տարի առաջ աշխատանքից ազատվել է։
