ԵՐԵՎԱՆ, 8 փետրվարի — Sputnik. Պետական ու համայնքային կառույցների հաշվեկշռում կան գույքեր, որոնք բացի պահպանման ծախսերից, պետությանն այլ բան չեն տալիս։
Այս մասին այսօր կառավարության նիստում հայտարարեց ՀՀ վարչապետ Կարեն Կարապետյանը։
Գործադրի ղեկավարը պատկան կառույցներին հանձնարարեց 1 ամսվա ընթացքում պետգույքի կառավարման ծառայության հետ համատեղ կատարել նման գույքերի հաշվառում և կազմակերպել դրանց օտարումը՝ աճուրդի միջոցով։
Բացի գույքից պետությանն անհարկի ծախսեր են պատճառում նաև ոռոգվող, բայց գյուղատնտեսության նպատակով չօգտագործվող հողատարածքները։ Նախնական հաշվարկով դրանք կազմում են 24 000 հա։
«Սա պրոբլեմ է։ Ջանքեր ենք ծախսում, գումարներ, որ այս տարածքները ոռոգելի պահենք, բայց դրանք պրոցեսին որևէ կերպ չեն մասնակցում»,- ասաց Կարապետյանը։
Իսկ, քանի որ դրանք հիմնականում մասնավորեցված տարածքներ են, և դրանց պետականացման իրավական կարգավորումները ՀՀ օրենսդրությամբ սահմանված չեն, վարչապետը հանձնարարեց մշակել և ներկայացնել առաջարկներ այս խնդիրը լուծելու նպատակով։
Կարեն Կարապետյանի երրորդ հանձնարարականը վերաբերում էր համայնքային խորհրդանիշներին։ Վարչապետի խոսքով՝ դրանք այսօր մշակվում են համայնքի ղեկավարների հայեցողությամբ և չունեն որևէ ընդհանուր կանոն։ Վարչապետը հանձնարարեց պատասխանատու պետական մարմիններին համայնքների ղեկավարների հետ մշակել ընդհանուր կանոններ։
