ԵՐԵՎԱՆ, 8 փետրվարի — Sputnik. Հունահռոմեական ոճի ըմբշամարտիկ Միհրան Հարությունյանը Instagram սոցիալական ցանցում տեսանյութ է տեղադրել հայկական ծերանոցից։
«Հայաստանում չէի կարող չայցելել ծերանոց։ Զգացմունքները խեղդում էին ինձ։ Գլխավորը` երբեք մի մոռացեք ձեր ծնողներին, հորեղբայրներին, մորաքույրերին։ Ցավոք, նրանք մեզանից բացի ոչ ոք չունեն։ Լավ նայեք ձեզ ու ձեր հարազատներին», – գրել է մարզիկը։
Սոսո Պավլիաշվիլու «Աղոթենք ծնողների համար» հուզիչ երգի ներքո հայ չեմպիոնը շփվել է հաստատության տարեց բնակիչների հետ։ Միհրանին ծերանոցում դիմավորել են ծափահարություններով, շատ տարեց մարդիկ չեն կարողացել զսպել իրենց արցունքները։ Տատիկները գրկել են հայ ըմբիշին և շատ զգացված են եղել նրա ուշադրությունից։
Օրերս Հարությունյանը կնոջ հետ ժամանել էր Հայաստան։ Նա վիթխարի ծրագրեր ունի` ըմբշամարտի դպրոց բացել Արցախում, ինչպես նաև խառը մենամարտերի մարզիկ Էդուարդ Վարդանյանի հետ վարպետության դաս տալ պատանի մարզիկներին, որոնք ցանկանում են զբաղվել այդ մարզաձևով։