ԵՐԵՎԱՆ, 7 փետրվարի — Sputnik. Բենզինի թանկացումը Հայաստանում չի ազդի ծառայությունների և ապրանքների վրա։ Այդ մասին ԱԺ–ում կառավարության հետ հարց ու պատասխանի ժամին ասաց վարչապետ Կարեն Կարապետյանը` պատասխանելով ՀՅԴ պատգամավոր Արմենուհի Կյուրեղյանի` դիզվառելիքի, բենզինի և գազի հարկերի աճի մասին հարցին։
Ինչպես Sputnik Արմենիայի թղթակցին հայտնեց ՀՀ գյուղնախարար Իգնատի Առաքելյանը, գյուղացիների համար դիզելի սուբսիդավորման առաջարկն արդեն պատրաստ է և քննարկվում է կառավարությունում։
Հայաստանում բենզինով չեն աշխատում բեռնատարերի ու հասարակական տրանսպորտի մեծ մասը։ Այդ պատճառով էլ ոչ ապրանքների գինը, ոչ տրանսպորտի ուղեվարձը չպետք է թանկանա, ընդգծեց նա։
«Իսկ ովքեր անձնական ավտոմեքենաները բենզինով են քշում, նրանք միշտ ունեն գազի անցնելու այլընտրանք։ Ես այդ մասին ասել եմ նաև նախկինում, սակայն խոսքերիս այլ «այլընտրանք» էին վերագրել. ում դուր չի գալիս հասարակական տրանսպորտով երթևեկել, թող ոտքով քայլեն։ Նման բան ես չեմ ասել։ Ես ասել եմ, որ գների ուժեղ թանկացման համար հիմքեր չկան», – նշեց Կարապետյանը։
Նշենք, որ 2018 թվականի հունվարից հանրապետությունում 10-15%–ով թանկացել է բենզինը, սեղմված գազը և դիզվառելիքը. առաջին երկուսի դեպքում ակցիզի թանկացման և դիզվառելիքի դեպքում` ԱԱՀ մտցնելու պատճառով։
