ԵՐԵՎԱՆ, 6 Փետրվար — Sputnik. 2017թ.-ի դեկտեմբերին «Զանգեզուր» կենսոլորտային համալիրի աշխատակիցները հայտնաբերել են 600-ից ավելի ապօրինի հատված ծառեր, սակայն դրանց մասին չեն հայտնել ո՛չ Ոստիկանությանը, ո՛չ էլ բնապահպանության և ընդերքի տեսչությանը։ Այս մասին Sputnik Արմենիային հայտնեց բնապահպան-լրագրող Նարինե Կիրակոսյանը։
Նրա տեղեկություններով, ապօրինի ծառահատումներն իրականացվել են 2009թ.-ին «Զանգեզուր» կենսոլորտային համալիրի տարածքում ստեղծված «Արևիկ» ազգային պարկում։
«Դեպքը տեղի է ունեցել Մեղրու տարածաշրջանի Լիճք, Տաշտուն, Վահրավար և Թղկուտ տեղամասերում»,- ասաց Կիրակոսյանը։
Նա որպես ապացույց նաև լուսանկարներ ներկայացրեց։
«Լուսանկարներն արվել են դեպքի վայրում, այն պահին, երբ ազգային պարկի աշխատակիցները պետք է գրանցեին հայտնաբերվածն ու այդ մասին տեղեկացնեին համապատասխան մարմնին: Լուսանկարներում երևում է, թե ինչպես է «Զանգեզուր» կենսոլորտային համալիրի աշխատակիցներից մեկը գրանցում խախտումը։ Երևում է նաև գրանցամատյանը, ինչը ենթադրում է, որ հայտնաբերված կոճղերը պետք է նաև համարակալվեին»,- ասաց նա։
Sputnik Արմենիան պարզաբանման համար դիմեց Բնապահպանության և ընդերքի տեսչության մամուլի քարտուղար Վրույր Պեպանյանին։ Նա հայտնեց, որ տեսչությունում այս պահին ուսումնասիրում են ահազանգը և այդ մասին մանրամասն տեղեկություններ կհայտնեն ավելի ուշ:
Նշենք, որ նախնական տվյալներով` հատվել են 2-3 տասնյակ ծառ, հիմնականում` կաղնի, բոխի և թխկի։
Նարինե Կիրակոսյանը վստահեցրեց, որ «Զանգեզուր» կենսոլորտային համալիրի տնօրինությունը ոչ միայն լռել է, այլև Բնապահպանության և ընդերքի տեսչական մարմին ներկայացրած հաշվետվության մեջ խախտումների 0-ական ցուցանիշ է ներկայացրել։
«Տեսչական մարմնի տնօրեն Եղիշ Տերտերյանը տարակուսանք է հայտնել, որ այսպիսի «օրինապաշտ» ազգային պարկ ունենք և պահանջել, որ իր ղեկավարած մարմինը անցկացնի ստուգումներ: Որոշ տեղեկություններով, «Զանգեզուր կենսոլորտային համալիր» ՊՈԱԿ-ի տնօրեն Վարդան Գևորգյանը տեղյակ է եղել խախտումների մասին, նաև ներկա է եղել վերը նշված գործընթացին, սակայն պնդում է, որ տարածքները չեն մտնում «Արևիկ» ազգային պարկի մեջ»,- ասաց Կիրակոսյանը։
Նշենք, որ «Արևիկ» ազգային պարկ ստեղծվել է 2009 թվականին։ Գտնվում է Սյունիքի մարզում Զանգեզուրի լեռնաշղթայի Մեղրի լեռնաբազուկի հարավային լանջին, ինչպես նաև Աստղաձոր և Նյուվադի գետերի ջրահավաք ավազանում։ Մակերեսը կազմում է 34 401․8 հա։ Պահպանության օբյեկտը Մեղրու եզակի բուսական և կենդանական աշխարհն է։
