ԵՐԵՎԱՆ, 6 փետրվարի — Sputnik, Լաուրա Սարգսյան. Երիտասարդ խոհարարների օլիմպիադայում (YOUNG CHEF 2018), որն անցկացվեց Հնդկաստանում, բնականաբար ներկայացվեցին նաև հայկական տոլման, կոնյակն ու արցախյան թթի օղին, Sputnik Արմենիայի թղթակցի հետ զրույցում ասաց «Հայ խոհարարական ավանդույթների զարգացման և պահպանման» ՀԿ գործադիր տնօրեն Արբի Ղարախանին։
«Տոլման արտամրցութային էր։ Բացման ժամանակ յուրաքանչյուր պատվիրակություն պետք է իր ազգային ավանդական ուտեստը պատրաստեր։ Մենք ներկայացրինք տոլման, որը բոլորին դուր եկավ։ Հավանեցին նույնիսկ Թուրքիայի մասնակիցները», — ասաց Ղարախանին։
Նա պատմեց, որ այնքան են մտերմացել Թուրքիայի պատվիրակության հետ, որ նույնիսկ լուսանկարվել են հայկական դրոշի ու տոլմայի ֆոնին։ Համագործակցության նախաձեռնողը թուրքական կողմն է եղել։
Բլղուրով և աղացած մսով տոլման Հնդկաստանում իսկական ֆուրոր է առաջացրել։ Հայ մասնակիցները ստիպված են եղել հնդիկներին սովորեցնել տոլմայի պատրաստման նրբությունները։
«Մրցույթի մասնակիցները զարմացել էին, որ Հայաստանը կոնյակ է արտադրում։ Նրանց շատ դուր եկավ մեր խմիչքը», — ասաց Ղարախանին։
«Հայ խոհարարական ավանդույթների զարգացման և պահպանման» ՀԿ-ի նախագահ Սեդրակ Մամուլյանն էլ անչափ կարևորեց հայ խոհարարների մասնակցությունը նման միջոցառումներին։
«Սա շատ կարևոր է մեր խոհանոցի զարգացման, տարածման և հանրահռչակման համար։ Այս օլիմպիադան հիանալի հնարավորություն է մեր երիտասարդ խոհարարների համար ցուցադրելու իրենց կարողությունները և մեր երկիրն ըստ արժանվույն ներկայացնելու համար», — Sputnik Արմենիայի թղթակցի հետ զրույցում ասաց Մամուլյանը։
Օլիմպիադայի բացման արարողությունը, որին մասնակցել է 50 խոհարար աշխարհի 50 երկրից, անցկացվել է հունվարի 28-ին Դելիում, իսկ առաջին փուլը` Հնդկաստանի Պունա քաղաքում։
«Առաջին մրցույթի համար մենք պատրաստեցինք «Սպանախով ձու ֆլորենտինական ձևով», աղանդերին սուֆլե մատուցեցինք։ Երկրորդ փուլին, որն անցկացվեց Կալկաթայում, յուրաքանչյուր մասնակցի տրված 30 տեսակ բաղադրիչներից մենք պետք է մեր ճաշակով հիմնական ուտեստ պատրաստեինք` նախաճաշ և աղանդեր», — ասաց Ղարախանին։
Ժյուրին բարձր է գնահատել հայ երիտասարդ խոհարար Արայիկ Ամզայանի մտահղացումը։ Հայկական պատվիրակությունը սոուսով լապշա է պատրաստել հնդկացորենի ալյուրից որպես հիմնական ուտեստ, իսկ նախաճաշին` տոֆու պանրից ապուր և արքայախնձորի ու խնձորի սոուսից աղանդեր։
Ինչ վերաբերում է երրորդ փուլի հիմնական ուտեստին, խոհարարներն առանց ոսկորների հավ են մատուցել կարտոֆիլից պատրաստած խավարտով և «շուի» համար նախատեսված եփած խմորով աղանդեր։
Օլիմպիադայի շրջանակում հայկական կողմը Հնդկաստանի խոհարարական քոլեջի հետ համագործակցության պայմանագիր է ստորագրել։ Ուսանողների և դասախոսների փոխանակում է նախատեսվում և այլն։
