ԵՐԵՎԱՆ, 6 փետրվարի — Sputnik. Շվեյցարիան զարգացնում է հարաբերություններն այլ երկրների հետ` ելնելով սեփական ժողովրդի շահերից։ Այդ մասին Երևանում հայտարարեց Շվեյցարիայի Ազգային խորհրդի (խորհրդարանի) նախագահ Դոմինիկ դը Բյումանը Հայաստանի ԱԺ նախագահ Արա Բաբլոյանի հետ համատեղ ասուլիսի ընթացքում։
2012թ-ից Շվեյցարիայում գործում է Ադրբեջանի պետական նավթային ընկերության (SOCAR) լցակայանների ցանց։ Այն հարցին, թե կարո՞ղ են արդյոք բիզնեսի շահերն ազդել Շվեյցարիայի արտաքին քաղաքականության վրա, դը Բյումանը պատասխանեց. «Շվեյցարիան կառուցում է իր տնտեսական և քաղաքական կապերը` ելնելով իր երկրի ու գործընկերների համատեղ շահերից»։
Հայաստանի խորհրդարանի խոսնակ Արա Բաբլոյանը (բժշկական գիտությունների դոկտոր, մի քանի տարի վերապատրաստում է անցել Շվեյցարիայում և տիրապետում է ֆրանսերենի) իր հերթին նշեց` ով շվեյցարացիներին կասկածում է արծաթասիրության մեջ, լավ չի ճանաչում նրանց։
«Չցանկանալով որևէ մեկին նեղացնել` կասեմ` շվեյցարացիներն ավելի անկեղծ են, քան մարդիկ կարող են պատկերացնել», — հայտարարեց Բաբլոյանը։
Ադրբեջանի և Շվեյցարիայի միջև տնտեսական հարաբերությունները ոչ ոք չեղյալ չի հայտարարել։ Դրանք չեն ազդում քաղաքականության վրա։ Լավագույն ապացույցը 2016թ-ին ԵԽԽՎ-ում անցկացված քվեարկությունն է` Արցախում «բռնության» մասին Ուոլտերի զեկույցի վերաբերյալ։
Շվեյցարիայի վեց պատգամավորներից հինգը դեմ են քվեարկել։ Միակ ձեռնպահ մնացած մարդը եղել է Շվեյցարիա-Ադրբեջան խորհրդարանական խմբի նախագահը. նա այլ կերպ չէր կարող քվեարկել` ելնելով էթիկայից։
«Այսինքն շվեյցարացիները քվեարկել են խաղաղության և ժողովրդավարության համար», — ասաց Բաբլոյանը։
Շվեյցարիայի պատվիրակության կազմը բավական խոսուն է. Հայաստան են ժամանել խոսնակը, երկու փոխխոսնակները և տասը պատգամավոր։ Այստեղ նրանք անցկացրել են հինգ օր` երկու անգամ ավելի շատ, քան սովորաբար մնում են պաշտոնական պատվիրակությունները։
