«Կովկասյան գործընկերություն» կազմակերպության հիմնադիր ղեկավար, Արդարադատության նախկին նախարար Հովհաննես Մանուկյանը դեմ չէ կառավարության նիստերը դռնփակ անցկացնելու որոշմանը, բայց կարծում է, որ այն աննպատակահարմար է և ունի կոնցեպտուալ սխալ։
«Գործադիր իշխանության գործելաոճն էականորեն տարբերվում է դատական և օրենսդիր իշխանության գործունեությանը բնորոշ պրոտոկոլներից։ Ի տարբերություն վերջինների, որտեղ հրապարակայնությունը կանոն է, և շատ բացառիկ դեպքերում է միայն թույլատրելի դռնփակ որոշակի քննություն կամ քննարկում իրականացնել, գործադիր իշխանության գործունեության կոնցեպտը ճիշտ հակառակն է։ Այսինքն` նիստերն ու քննարկումները սովորաբար հանրության աչքի առաջ տեղի չեն ունենում»,- ասում է Մանուկյանը։
Բայց սա, նրա համոզմամբ, չի նշանակում, թե հանրությունը պետք է անտեղյակ լինի կառավարության գործունեությունից, որոշումներից ու աշխատանքից։
Հովհաննես Մանուկյանը չի կարծում, թե կառավարության նիստերի հեռարձակումը միակ պատճառն է, որ դրանց ժամանակ ակտիվ քննարկումներ տեղի չեն ունենում, բայց կարող է կաշկանդել կառավարության անդամներին։
