ԵՐԵՎԱՆ, 31 հունվարի — Sputnik. Թուրքիայի խորհրդարանի պատգամավոր Կարո Փայլանը Twitter-ում պատմել է Ֆրանսիայի նախագահ Էմանուել Մակրոնի հետ զրույցի մասին։
Փայլանը Մակրոնի հետ հանդիպել է Ֆրանսիայի հայկական կազմակերպությունների Համակարգող խորհրդի ամենամյա ընթրիքի ժամանակ։
«Ես հայ համայնքի միջոցառման պատվավոր հյուրն եմ։ Մակրոնի հետ զրույցում Թուրքիայի և Աֆրինի վերջին իրադարձությունների հետ կապված մեր մտահոգությունն եմ հայտնել», — գրել է Փայլանը` մի քանի լուսանկարներ տեղադրելով։
Նույն միջոցառման ժամանակ Փարիզի քաղաքապետ Անն Իդալգոն Կարո Փայլանին հանձնել է Grand Vermeil պատվո մեդալը` արիության և Թուրքիայում մարդու իրավունքի ու ժողովրդավարության համար կյանքը վտանգելու պատրաստակամության համար։
Onur konuğu olduğum Fransa Ermeni toplumunun etkinliğinde, Cumhurbaşkanı Macron ile Türkiye ve Afrin’deki son gelişmelerle ilgili kaygılarımızı paylaştık. pic.twitter.com/DZwPxJw1CH
— Garo Paylan (@GaroPaylan) 31 января 2018 г.
Կարո Փայլանը Թուրքիայի խորհրդարանի երեք հայ պատգամավորներից մեկն է, որն առաջադրվել է քրդամետ Ժողովրդադեմոկրատական կուսակցության ցուցակներով։
2017թ-ի սկզբին Կարո Փայլանը պատժվել էր «ցեղասպանություն» բառն օգտագործելու համար, նրան զրկել էին խորհրդարանի երեք նիստի մասնակցելու իրավունքից։ Ավելի ուշ առաջարկել էին նրան զրկել պատգամավորի մանդատից «ազգային ատելություն հրահրելու» համար։ Սակայն ապրիլի 24-ին` Հայոց ցեղասպանության 101-րդ տարելիցի օրը, Կարո Փայլանը պահանջել էր անցկացնել օրենքի փորձաքննություն, որի համաձայն Թուրքիայից արտաքսվել են հազարավոր հայեր։ Նա կոչ էր արել թուրք խորհրդարանականներին օգնել արդարությունն ու ճշմարտությունը վերականգնելու գործին` նոր հանցագործություններից խուսափելու համար։
