ԵՐԵՎԱՆ, 29 հունվարի — Sputnik. Հայաստանը կողմ է, որ Սիրիայի հյուսիսում առկա խնդիրը լուծվի բանակցությունների միջոցով, ասաց ՀՀ արտգործնախարար Էդվարդ Նալբանդյանը 2017 թվականի ամփոփիչ ասուլիսի ժամանակ։
«Մտահոգություն է առաջացնում այն, որ նոր լարվածություն է առաջացել այս տարածաշրջանում, որը մարդկային զոհերի պատճառ է դարձել քաղաքացիական բնակչության շարքերում: Կան նաև վիրավորներ, որոնց թվում են սիրիահայեր: Սա լուրջ մտահոգության առիթ է տալիս: ԻՊ-ի և ընդհանրապես ահաբեկչության դեմ պայքարում վերջին շրջանի հաջողությունները հույս էին ներշնչում, որ կարող է իրավիճակը գնալ կայունացման և Սիրիայում խաղաղության հաստատմանը», — ասաց Նալբանդյանը:
Այս կարգի լարվածությունը, նրա խոսքով, կարող է լուրջ խոչընդոտ հանդիսանալ կայունացման գործընթացի համար:
Նա նշեց, որ հայկական կողմը միշտ կողմ է, որ բոլոր խնդրահարույց հարցերը լուծվեն բանակցային ճանապարհով, պետք է օգտագործվեն այն միջազգային հարթակները, որոնք այս գործընթացում առաջարկվում են։
«Նկատի ունեմ Աստանայի և Ժնևի գործընթացները, Սոչիում մեկնարկում է Սիրիական ազգային երկխոսության կոնգրեսը, որը ևս մի կարևոր միջազգային հարթակ է։ Հույս ունենք, որ այդ ամենը թույլ կտա շարժվել դեպի կայունություն և խաղաղություն», — ասաց Նալբանդյանը։
Սիրիական ազգային երկխոսության կոնգրեսն անցկացվելու է Սոչիում հունվարի 30-ին։ Ռուսաստանի ԱԳՆ-ն սիրիական հասարակության, ՄԱԿ-ի ներկայացուցիչներին (որպես դիտորդ), ինչպես նաև մի շարք տարածաշրջանային և միջազգային գործընկերների հրավիրել է կոնգրեսին։ Միացյալ ընդդիմության պատվիրակությունը` բանակցությունների գծով սիրիական հանձնաժողովը, հրաժարվել է մասնակցությունից։
Թուրքիայի զինված ուժերի Գլխավոր շտաբը 2018 թվականի հունվարի 20-ին հայտարարել է, որ «Ձիթենու ճյուղ» օպերացիա է սկսում: Գործողությունը ուղղված է սիրիական Աֆրինում տեղակայված քրդական զինված խմբավորումների դեմ: Թուրքիայի նախագահ Ռեջեփ Թայիփ Էրդողանը հայտարարել է, որ զորքը Սիրիայից դուրս կբերի գործողությունների նպատակներին հասնելուց անմիջապես հետո։
Դամասկոսը դատապարտել է Թուրքիայի ներխուժումը` Անկարային մեղադրելով Սիրիայի ինքնիշխանության նկատմամբ ոտնձգություններ կատարելու մեջ։
