Լաուրա Սարգսյան, Sputnik Արմենիա
Աշխարհահռչակ տենոր Գեղամ Գրիգորյանի և թատերական նկարիչ, բեմադրող-նկարիչ, գեղանկարիչ Թեյմուրազ Մուրվանիձեի ընկերությունը եզակի էր, Sputnik Արմենիայի թղթակցի հետ զրույցում ասաց Մուրվանիձեն` մեծ տենորին նվիրված քանդակի հեղինակը։
«Գեղամի հետ մենք ավելին էինք, քան ընկերներ, մենք եղբայրներ էինք։ Շատ տարիներ մենք միասին աշխատել ենք Մարիինյան թատրոնում. նա մենակատար էր, ես` նկարիչ։ Այդ ժամանակ մենք մեր ընկերներից մեկի հետ ապրում էինք մի բնակարանում», — Sputnik Արմենիայի թղթակցի հետ զրույցում ասաց Մուրվանիձեն։
Վրացի նկարիչն աստվածացրել է Գրիգորյանի տաղանդն ու ձայնը։ Իսպանացի տենոր Պլասիդո Դոմինգոն բազմիցս նշել է, որ Գրիգորյանն անկրկնելի տեմբր ունի, հիշում է երգչի ընկերը։ Անկրկնելի և եզակի է եղել նաև հայ տենորի հետ ընկերությունը, ասում է Մուրվանիձեն` մաղթելով, որ յուրաքանչյուր մարդ այդպիսի մտերմություն զգա։
«Ես ամենաշատը կարոտում են այն ժամանակները, երբ ես ու Գրիգորյանը միասին էինք ապրում։ Մեր բնակարանում շատ մարդիկ էին հավաքվում, բոլորի համար հետաքրքիր էր մեզ մոտ։ Ես կուզեի հետ տալ ժամանակը և կրկին հայտնվել այդ բնակարանում»,- խոստովանում է Մուրվանիձեն։
Վրացի քանդակագործը 12 տարով մեծ է Գրիգորյանից։
«Գեղամը մի անգամ կեսկատակ-կեսլուրջ ասաց, որ եթե ես ավելի շուտ մահանամ, ապա նա ստիպված կլինի երգել իմ գերեզմանի մոտ, ուստի ավելի լավ կլինի, որ ես ավելի երկար ապրեմ ու նրա քանդակը կերտեմ», — հիշում է Մուրվանիձեն։
Մտերիմ ընկերոջ մահն իսկական հարված է եղել վրացի նկարչի համար։ Նա առանց երկար մտածելու կարճ ժամանակում նկարել է Գեղամ Գրիգորյանին նվիրված քանդակի էսքիզը։ 3 մետր 5 սմ բարձրությամբ բրոնզաձույլ թռչունը լիովին արտացոլում է մեծ երգչի ոգին, ձայնը և էությունը, վստահ է Մուրվանիձեն։
«Քանդակը պատրաստվել է հենց Թբիլիսիում, այս քաղաքը Գեղամը շատ էր սիրում։ Մայրը Թբիլիսիի հայ էր, և նրա կապն այդ քաղաքի հետ յուրահատուկ էր։ Մայրը շատ երիտասարդ տեսք ուներ, և ես հաճախ կատակով նրանց քույր ու եղբայր էի անվանում», — ասում է Մուրվանիձեն։
Վրաստանի հանդեպ սերը փոխադարձ էր, կարծում է Հայաստանում Վրաստանի արտակարգ և լիազոր դեսպան Գեորգի Սագանելիձեն։ Վրաստանում հայ տենորին սիրում էին, հատկապես նրանից հետո, երբ նա կատարեց Մալխազի` Զախարիա Պալիաշվիլու «Դաիսի» օպերայի հայտնի հերոսի դերերգը։
Հունվարի 29-ին` տենորի ծննդյան օրը, Կոմիտասի անվան պանթեոնում բացվել է Գեղամ Գրիգորյանը քանդակը։ Այսօր Գրիգորյանը կդառնար 67 տարեկան։
