ԵՐԵՎԱՆ, 29 հունվարի — Sputnik. Հայաստանի արտգործնախարար Էդվարդ Նալբանդյանը, մեկնաբանելով Երևանում Գարեգին Նժդեհի հուշարձանը քանդելու համար կազմակերպված ստորագրահավաքը, կոչ է արել զգուշանալ այն ծուղակներից, որոնք Հայաստանի համար ստեղծում են հակառակորդները:
Ավելի վաղ ԶԼՄ-ներում տեղեկություն է հրապարակվել, որ նախորդ շաբաթ Ռուսաստանի Պետդումայում կայացած «Ֆաշիզմի հերոսացման և նեոնացիզմի վերածնման դեմ պայքարի, օրենսդրական ասպեկտներ» թեմայով կլոր սեղան-քննարկման ժամանակ քաղաքագետ Սերգեյ Մարկովը (հայտնի է իր ադրբեջանամետ դիրքորոշմամբ) հայտարարել է, որ Հայաստանն այն երկրների թվում է, որտեղ այսօր կան ֆաշիզմի հանցակիցների արձաններ՝ նկատի ունենալով Երևանում Գարեգին Նժդեհի արձանը:
«Պարզ է, թե ինչու են այս շահարկումներն արվում։ Պետք չէ ընկնել ծուղակները: Այս թեմայով Հայաստանի կողմից ամենատարբեր մակարդակներով հայտարարություններ արվել են, և այստեղ ավելացնելու կամ պակասեցնելու բան չկա», — այսօր լրագրողների հետ հանդիպման ժամանակ ասաց Էդվարդ Նալբանդյանը։
Հայաստանի խորհրդարանի փոխխոսնակ և ՀՀԿ մամուլի քարտուղար Էդուարդ Շարմազանովն իր հերթին Aysor.am-ի հետ զրույցում հայտարարել է, որ պաշտոնական Մոսկվայի դիրքորոշումն այս հարցում հավասարակշիռ է։
«ՌԴ ԱԳՆ պաշտոնական ներկայացուցիչ Մարիա Զախարովան նշել է, որ Գարեգին Նժդեհի արձանը Հայաստանի ներքին գործն է։ Դա հավասարակշիռ դիրքորոշում է, այլ ոչ թե Ռուսաստանում այս կամ մարգինալ օղակների լոբբիստական գործունեություն։ Ես չեմ բացառում, որ նրանք նաև ադրբեջանական հետք ունեն», — ասել է Շարմազանովը։
Կլոր սեղանի ընթացքում Մարկովը նաև ասել է, որ Երևանում Նժդեհի արձանը քանդելու հանրագիրը Change.org կայքում ստորագրել է ավելի քան 200 հազար մարդ։
